Minn Cristian Muscat
Fost il-personalitajiet li ħallew impatt qawwi fuq il-futsal Malti tul dawn l-aħħar snin, l-isem ta’ George Frendo żgur li jispikka. B’karriera li tinfirex fuq aktar minn 14-il sena fil-futsal kompetittiv u b’12-il sena jirrappreżenta lit-tim nazzjonali Malti, Frendo bena reputazzjoni ta’ atleta dedikat, versatili u b’mentalità rebbieħa.
Imwieled fit-12 ta’ Settembru tal-1985 f’Ħal Qormi, Frendo rnexxielu jħalli l-marka tiegħu f’diversi dixxiplini sportivi, fosthom il-futbol, il-beach soccer u, fuq kollox, il-futsal.
Matul is-snin lagħab ma’ wħud mill-aqwa timijiet fil-futsal Malti, fosthom Valletta FC Futsal, Msida FC u Ta’ Xbiex Futsal, fejn dejjem spikka għall-kapaċità tiegħu li jiskorja, il-konsistenza u l-esperjenza kbira li kien iġib fit-timijiet tiegħu.
Fil-fatt, waqt iż-żmien tiegħu ma’ Ta’ Xbiex Futsal, Frendo kellu diversi wirjiet memorabbli, fosthom partiti fejn skorja erba’ gowls f’logħba waħda. Il-wirjiet tiegħu wassluh biex jirbaħ ukoll il-premju tal-Enemed Player of the Month f’Diċembru tal-2021.
Il-karriera tiegħu ma kinitx limitata biss għal-livell lokali. Frendo rrappreżenta lil Malta mat-tim nazzjonali tal-futsal għal 12-il sena, filwaqt li kien ukoll parti mit-tim nazzjonali tal-beach soccer. Illum il-ġurnata għadu attiv fl-isport permezz tat-tim nazzjonali tal-veterani tal-futbol, xhieda ċara tal-imħabba kbira li għandu lejn il-logħba.
Issa, wara snin twal fil-grawnd u fil-court, George Frendo qed jibda sfida ġdida wara li ġie maħtur Viċi President fuq l-operat tal-Futsal Malta Association għall-perjodu 2026-2029.
F’intervista ma’ dan is-sit, Frendo qal li d-deċiżjoni li jidħol fl-amministrazzjoni tal-futsal kienet waħda naturali.
“Ġejt innominat minn Nathaniel Jones, il-president il-ġdid tal-Futsal Malta Association, biex inkun parti minn dan il-kumitat għall-erba’ snin li ġejjin. Wara aktar minn 14-il sena nilgħab il-futsal u wara 12-il sena mat-tim nazzjonali, ħassejt li wasal il-mument li nagħti xi ħaġa lura lill-isport li tani tant sodisfazzjon.”
Għalih, il-futsal mhuwiex biss logħba.
“Il-futsal tani ħbiberiji, esperjenzi li ma jintesewx u opportunitajiet li qatt ma kont nimmaġina. Għalhekk illum inħoss li għandi dmir lejn dan l-isport biex inkompli nagħti sehmi, din id-darba minn perspettiva differenti.”
Frendo qal li jinsab eċitat ħafna għal dak li ġej.
“Qed inħares ’il quddiem biex nieħu dik li bl-Ingliż insejħulha handover u nibda naħdem flimkien mal-kumitat il-ġdid. Sar ħafna xogħol tajjeb fis-snin li għaddew u rridu nibnu fuq il-pedamenti li diġà ġew maħluqa.”
Huwa ma naqasx milli jirringrazzja lill-amministrazzjoni preċedenti, li skontu ħalliet warajha bażi soda.
“L-amministrazzjoni ta’ qabel ħadmet b’dedikazzjoni kbira. Għandna nirrikonoxxu dak kollu li sar, għaliex illum il-futsal jinsab f’pożizzjoni ferm aħjar minn dik ta’ snin ilu.”
Meta tkellem dwar l-objettivi tal-kumitat il-ġdid, Frendo kien ċar ħafna.
“L-għan ewlieni tagħna hu li nkomplu nkabbru dan l-isport. Il-futsal għandu potenzjal enormi u rridu nkomplu noħolqu opportunitajiet biex aktar nies ikunu involuti fih.”
Wieħed mill-punti li enfasizza b’mod partikolari kien l-investiment fit-tfal u ż-żgħażagħ.
“It-tfal u ż-żgħażagħ huma l-futur tal-futsal Malti. Irridu ninvestu aktar fihom, noħolqu aktar inizjattivi u nkomplu nagħtu spazju lil talent ġdid biex jiżviluppa.”
Skont Frendo, il-futsal għandu rwol importanti fil-formazzjoni ta’ plejers żgħażagħ.
“Il-futsal jgħin biex il-plejers jiżviluppaw teknikament, jieħdu deċiżjonijiet aktar malajr u jtejbu l-fehim tagħhom tal-logħba. Għalhekk narah bħala għodda importanti ħafna għall-iżvilupp sportiv taż-żgħażagħ.”
Huwa jinsisti wkoll li l-futsal m’għandux jitqies bħala rivali tal-futbol.
“Il-futsal m’għandux jikkompeti mal-futbol. Għall-kuntrarju, għandu jikkumplimentah. Iż-żewġ dixxiplini jistgħu jgħinu lil xulxin u jikbru flimkien.”
Frendo sostna wkoll li waħda mill-prijoritajiet tiegħu se tkun li l-futsal isir aktar viżibbli u aktar aċċessibbli għall-pubbliku. Huwa jemmen li hemm bżonn ta’ aktar promozzjoni tal-isport, kemm fil-komunitajiet lokali kif ukoll fl-iskejjel, sabiex aktar tfal u familji jiskopru l-valuri u l-opportunitajiet li joffri l-futsal.
Skontu, aktar parteċipazzjoni tfisser aktar kompetizzjoni, aktar talent u bażi aktar b’saħħitha li minnha jistgħu jibbenefikaw kemm il-klabbs kif ukoll it-timijiet nazzjonali fis-snin li ġejjin.
Din hija filosofija li Frendo jrid jara implimentata b’mod aktar konkret fis-snin li ġejjin.
“Irridu nkomplu naħdmu mal-entitajiet kollha involuti fl-isport sabiex noħolqu aktar sinerġiji u nagħmlu dak li hu l-aħjar għall-plejers u għall-futur tal-futsal.”
Naturalment, huwa konxju li hemm diversi sfidi quddiem il-kumitat il-ġdid.
“Xejn ma jiġi waħdu. Se jkun hemm sfidi u se jkun hemm ħafna xogħol x’isir. Imma jien persuna li dejjem emmint fix-xogħol u fid-dedikazzjoni.”
Fl-aħħar tal-intervista tiegħu, George Frendo bagħat messaġġ ċar u pożittiv.
“Issa wasal iż-żmien li nxammru l-kmiem u nibdew naħdmu. Il-futsal Malti jixraqlu l-aħjar. Għandna nies b’passjoni kbira u flimkien nistgħu nkomplu nibnu sport aktar b’saħħtu, aktar organizzat u b’aktar opportunitajiet għall-ġenerazzjonijiet li ġejjin.”
Minn plejer li għal aktar minn għaxar snin kien wieħed mill-protagonisti ewlenin fil-court, George Frendo issa qed jibda kapitlu ġdid fejn se jipprova jagħmel differenza mill-amministrazzjoni.
U jekk il-passjoni li dejjem wera bħala atleta tibqa’ takkumpanjah f’din l-esperjenza ġdida, il-futsal Malti jista’ jħares lejn il-futur b’ottimiżmu akbar.