Il-General Workers’ Union tirreferi għad-diskussjoni pubblika li għaddejja bħalissa dwar il-proposta tal-Ministeru għall-Edukazzjoni fuq il-futur tal-edukazzjoni vokazzjonali fil-livell sekondarju.
Il-GWU dejjem żammet mal-prinċipju li l-ħiliet manwali, tekniċi u prattiċi mhumiex ta’ inqas valur għall-ekonomija u għas-soċjetà tagħna minn kwalunkwe forma oħra ta’ talent.
Wara kull industrija, kull servizz u kull post tax-xogħol f’dan il-pajjiż hemm ħaddiema li l-ħila tagħhom, imħarrġa tul is-snin, iżżomm lil Malta miexja.
Din il-ħila tistħoqqilha għarfien, investiment u rispett, mhux bħala alternattiva inferjuri għall-kisba akkademika, imma bħala triq siewja u leġittima fiha nnifisha.
Fuq dan il-prinċipju tistrieħ il-pożizzjoni tal-Unjin dwar din il-proposta: kull student li juri talent għal ħiliet prattiċi, tekniċi jew vokazzjonali jistħoqqlu triq edukattiva li tgħinu jilħaq dan il-għan, bl-istess serjetà, l-istess kwalità u l-istess opportunità għal futur sabiħ bħal kull student ieħor.
L-Unjin tirrappreżenta eluf ta’ ħaddiema fis-snajja u fil-professjonijiet tekniċi li l-kontribut tagħhom bena, u għadu jibni, lil dan il-pajjiż. L-esperjenza tagħhom turi li t-talent permezz tal-ħila kapaċi jwassal għal karrieri tajbin, imħallsa tajjeb u rispettati daqs kull forma oħra ta’ kisba, meta persuna tkun imrawwma sew u tingħata l-għodod li teħtieġ.
Għal din ir-raġuni, il-GWU tinsisti li kwalunkwe triq edukattiva ġdida trid titfassal b’involviment ġenwin tal-ħaddiema, l-unjins u l-industrija, u ma tkunx ibbażata fuq dak li kien sar fil-passat.
Il-kwalità, id-dinjità u opportunità ġenwina jridu jkunu fiċ-ċentru ta’ kwalunkwe riforma, sabiex l-ebda student li jagħżel din it-triq ma jħoss li t-talent tiegħu jiswa inqas.
Il-GWU tistenna bil-ħerqa li tikkontribwixxi għal dan il-proċess, sabiex kull student b’talent fil-ħiliet f’Malta u Għawdex jingħata triq ġenwina biex jilħaq il-potenzjal sħiħ tiegħu.
