Fi stqarrija uffiċjali, Gzira United FC qalu li d-dikjarazzjoni maħruġa mill-Partit Nazzjonalista dwar il-proġett Nicholl Ground hija diżappuntanti għax tonqos milli tirrikonoxxi l-kuntest storiku u legali ta’ dan is-sit.
L-istarrija tkompli li: “Iż-żona inkwistjoni mhijiex art ġdida li qed tittieħed mill-pubbliku. Huwa n-Nicholl Ground storiku, li ġie allokat lil Gżira United għal skopijiet sportivi mill-
1976. Il-proġett attwali sempliċement ikompli dak l-użu sportiv stabbilit għal żmien twil.”
“L-iżvilupp tal-courts tal-padel qed isir fl-istess żona li storikament ġiet assenjata lil Gżira United. Din mhijiex bidla fl-użu minn spazju pubbliku miftuħ għal sport, iżda t-tkomplija ta’ faċilità sportiva fuq art li serviet dak l-iskop għal għexieren ta’ snin.”
“Gzira United bdew ix-xogħlijiet fuq is-sit biss wara li ġew infurmati li, peress li s-
sit kien faċilità sportiva eżistenti u l-istrutturi proposti kienu temporanji, l-ebda
permess ta’ żvilupp ma kien meħtieġ.”
“Minkejja li aġixxew fuq dan il-ftehim, il-Klabb sussegwentement ġie mmultat €25,000. Gżira United kienet tistenna li l-Partit Nazzjonalista u organizzazzjonijiet oħra li jikkontestaw il-proġett jappoġġjaw, aktar milli jippenalizzaw, organizzazzjoni sportiva li taġixxi in bona fede biex ittejjeb il-faċilitajiet sportivi.”
“Huwa importanti wkoll li wieħed jiftakar li l-konċessjoni fuq Manoel Island kollha ngħatat lil MIDI plc fl-2000 taħt amministrazzjoni tal-Partit Nazzjonalista, u wittiet it-triq għal żvilupp residenzjali, inklużi appartamenti.”
“Fid-dawl ta’ din l-istorja, huwa diffiċli li tifhem għaliex il-Partit Nazzjonalista għażel li jopponi proġett li jippreserva l-użu sportiv storiku tan-Nicholl Ground, aktar milli jikkwestjona żvilupp li ssostitwixxa partijiet minn Manoel Island b’appartamenti.”
“Għalhekk Gżira United tistaqsi żewġ mistoqsijiet sempliċi:
L-ewwel, għaliex ċerti organizzazzjonijiet u individwi oħra huma tant determinati li jopponu dan proġett sportiv partikolari meta qed jiġi żviluppat fuq art li ilha ddedikata
għall-isport għal għexieren ta’ snin?”
“It-tieni, għaliex il-Partit Nazzjonalista għażel li jopponi proġett li jkompli l-użu sportiv storiku tan-Nicholl Ground minflok ma jappoġġja proġett li jsaħħaħ wieħed mill-eqdem klabbs tal-futbol ta’ Malta u jissalvagwardja l-futur tal-isport f’dan is-sit?”
“Gzira United jixtiequ wkoll jaffermaw mill-ġdid l-impenn sod tagħha lejn il-lokalità ta’ Gzira u lejn Manoel Island. Kif ġie rikonoxxut waqt l-approvazzjoni tal-applikazzjoni mill-Bord tal-Awtorità tal-Ippjanar, jekk il-qrati tal-padel proposti fl-aħħar mill-aħħar jirriżultaw li mhumiex kompatibbli mal-pjanijiet futuri tal-Gvern li jittrasforma Manoel Island f’Park Nazzjonali, Gzira United aċċettaw li se jirrilokaw dawn il-faċilitajiet sportivi għal sit alternattiv identifikat mill-Gvern.”
“Dan juri li l-objettiv tal-Klabb mhuwiex li jfixkel il-proġett tal-Park Nazzjonali
iżda li jiżgura li l-faċilitajiet sportivi jkomplu jservu lill-komunità filwaqt li jirrispettaw il-viżjoni fit-tul tal-Gvern għal Manoel Island.”
“Gzira United jibqgħu impenjati li jippreservaw ol-karattru sportiv tan-Nicholl Ground filwaqt li tinvesti f’faċilitajiet li se jibbenefikaw lill-klabb, lill-atleti tiegħu u lill-komunità usa’. Aħna nemmnu li din id-diskussjoni għandha tkun ibbażata fuq il-fatti storiċi kollha u l-iskop sportiv li ilu jeżisti tas-sit, aktar milli fuq narrattivi selettivi jew politikament konvenjenti.”
