Ħamrun 147 A għaddew għall-finali tal-Premier League tal-Blackball meta fis-semifinali għelbu lil Qormi Pinto A 21-18. Wara li l-ewwel konfront, intemm 12-8 favur il-Qriema, l-avversarji mill-Ħamrun dawru l-iskor favurihom sabiex issa se jkunu qed jiltaqgħu kontra Cospcicua Rangers A fil-finali li se ssir nhar il-Ġimgħa 19 ta’ Ġunju.
Fiċ-Challenger League, se jkun hemm żewġ semifinali interessanti hekk kif Qormi Pinto B jaffaċċjaw lil San Ġwann Tiki Taka Spartans filwaqt li Ħamrun 147 B jilagħbu kontra San Ġwann Tiki Taka Boys.
Fir-Regional League, Birkirkara Youngsters għelbu lil Żebbuġ St Joseph A 21-16 u issa jistennew l-avversarju tagħhom fis-semifinali l-oħra li se tintlagħab il-ġimgħa d-dieħla bejn Ħamrun 147 C u Selmun Sports Club A.
Fil-Community League se jkun hemm ukoll żewġ semifinali hekk kif PL Floriana jiltaqgħu kontra San Ġwann Tiki Taka Buddies filwaqt li Ħamrun 147 D jaffrontaw lil Cospicua Rangers B.
Finalment fl-Amateur League, intlagħbu żewġ kwarti tal-finali fejn Birżebbuġa St Peter’s B għelbu lil Siġġiewi Montekristo B 11-7 filwaqt li Ħamrun 1889 Bar rebħu 11-9 lil Selmun Sport B.
Fis-semifinali li se jsiru nhar it-Tnejn li ġej, Birkirkara Juve jilagħbu kontra Birżebbuġa St Peter’s B filwaqt li Birkirkara Boċċi għandhom impenn kontra Ħamrun 1889.
