L-investiment fil-Korpi Dixxiplinati huwa investiment dirett fis-sigurtà, fil-protezzjoni u fil-benesseri tal-poplu Malti u Għawdxi. Il-Korp tal-Pulizija, il-Forzi Armati ta’ Malta, id-Dipartiment tal-Protezzjoni Ċivili u s-Servizzi Korrettivi għandhom rwol essenzjali sabiex pajjiżna jkun jista’ jaffaċċja l-isfidi ta’ kuljum, jipproteġi liċ-ċittadini u jintervjeni f’mumenti ta’ emerġenza. Għalhekk, huwa importanti li dawn il-korpi jibqgħu jingħataw l-għodod, it-tagħmir, it-taħriġ u r-riżorsi umani meħtieġa sabiex ikunu jistgħu jwettqu dmirijiethom bl-aħjar mod possibbli.
L-investiment f’dawn il-korpi ma għandux ikun limitat biss għax-xiri ta’ tagħmir modern u t-titjib tal-infrastruttura, iżda għandu jinkludi wkoll l-investiment fil-persuni li ta’ kuljum jagħtu servizz lill-pajjiż. Għax, wara kull operazzjoni, kull intervent u kull sitwazzjoni ta’ emerġenza, hemm membri li jagħmlu xogħolhom b’dedikazzjoni, dixxiplina u sens ta’ responsabbiltà. Huwa għalhekk li l-kundizzjonijiet tax-xogħol, it-taħriġ kontinwu, ir-rikonoxximent tas-servizz u l-opportunitajiet ta’ żvilupp professjonali għandhom jibqgħu fuq nett tal-aġenda.
Id-diskussjoni dwar l-etajiet tal-ingaġġ m’għandhiex titqies bħala sempliċi bidla amministrattiva, iżda bħala opportunità biex jiġi evalwat jekk il-kriterji attwali għadhomx jirriflettu l-ħtiġijiet u r-realtajiet tal-lum. Is-soċjetà qiegħda tinbidel, il-ħiliet meħtieġa fuq il-post tax-xogħol jevolvu u l-esperjenza professjonali qed tikber f’oqsma differenti. Huwa raġonevoli li minn żmien għal żmien jiġu riveduti l-kundizzjonijiet tal-ingaġġ, dejjem b’konsultazzjoni mal-partijiet ikkonċernati u b’attenzjoni għall-karatteristiċi partikolari ta’ kull korp.
Diskussjoni bħal din tista’ tgħin ukoll biex jitwessa’ l-għadd ta’ persuni li jkunu jistgħu jikkunsidraw karriera fis-servizz dixxiplinat.
Dan kollu għandu jsir b’mod li jħares l-interessi tal-korpi nfushom u tal-membri li diġà qegħdin iservu fihom. Il-bidliet ma għandhomx joħolqu inċertezza dwar il-kundizzjonijiet tas-servizz jew il-prospetti tal-karriera, iżda għandhom ikunu parti minn strateġija ċara u fit-tul.
F’dan l-isfond, il-proposta li terġa’ tinfetaħ id-diskussjoni dwar l-etajiet tal-ingaġġ għandha tkun opportunità biex jiġu eżaminati l-prattiki eżistenti u jiġi stabbilit jekk hemmx lok għal aġġustamenti. Il-kwistjoni għandha tiġi indirizzata b’mod realistiku, filwaqt li jitqiesu l-età tal-irtirar, il-perjodu ta’ servizz meħtieġ, l-ispejjeż tat-taħriġ, il-ħtiġijiet operattivi u l-kapaċità tal-korpi li jintegraw membri ġodda. Dawn huma fatturi li jeħtieġu studju u konsultazzjoni sabiex kull deċiżjoni tkun sostenibbli u taqdi l-interess pubbliku.
Fl-aħħar mill-aħħar, is-sigurtà tal-pajjiż hija responsabbiltà li teħtieġ ippjanar, viżjoni u impenn kontinwu. L-investiment fil-Korpi Dixxiplinati qed isir grazzi għal ħidmet il-Gvern b’mod speċjali mill-Ministru għall-Intern u s-Sigurtà Glenn Bedingfield.
Dan għandu jibqa’ jinkludi kemm il-mezzi materjali kif ukoll il-kapital uman, filwaqt li d-diskussjoni dwar il-kundizzjonijiet tal-ingaġġ għandha ssir b’moħħ miftuħ u b’rispett lejn il-ħtiġijiet ta’ kull korp. Huwa b’dan il-mod li jistgħu jinstabu soluzzjonijiet li jħarsu l-istandards professjonali, jagħtu opportunitajiet ġusti lil kandidati adatti u jkomplu jsaħħu s-servizz li jingħata lill-poplu Malti u Għawdxi.
