Il-Bank of Valletta reċentement ospita seminar b’attendenza tajba ħafna għar-rappreżentanti tan-negozju, li ffoka fuq waħda mill-aktar kwistjonijiet ta’ tħassib illum — iċ-ċibersigurtà. Dan l-avveniment kellu l-għan li jgħammar lill-mexxejja tan-negozju b’għarfien u għodod essenzjali biex jipproteġu l-ħidma tagħhom mir-riskji dejjem akbar ta’ frodi, scams u attakki diġitali.
Fid-diskors tal-ftuħ tiegħu, il-Kap Eżekuttiv tal-BOV Kenneth Farrugia ddeskriva l-avveniment bħala l-ewwel wieħed tat-tip tiegħu organizzat mill-Bank of Valletta, u saħaq fuq l-impenn tal-Bank li jappoġġa l-komunità tan-negozju lil hinn mill-forniment ta’ servizzi finanzjarji. “Iċ-ċibersigurtà m’għadhiex biss kwistjoni tal-IT. Huwa riskju tan-negozju li jitlob attenzjoni fis-setturi kollha,” qal il-Kap Eżekuttiv. “L-evoluzzjoni tat-teknoloġija biddlet il-mod kif joperaw il-kumpaniji, iżda ppermettiet ukoll lill-kriminali ċibernetiċi jsiru aktar sofistikati, filwaqt li tisfrutta l-avvanzi fl-intelliġenza artifiċjali u t-tagħlim awtomatiku.”
Is-Sur Farrugia enfasizza fuq ir-rwol tal-edukazzjoni u s-sensibilizzazzjoni fil-bini tal-ewwel linja b’saħħitha ta’ difiża. “Iċ-ċibersigurtà hija waħda mill-inizjattivi ewlenin tal-BOV. Aħna impenjati li nissalvagwardjaw is-sistemi tagħna, in-nies tagħna, u l-aktar importanti, il-klijenti tagħna.”
Organizzat mit-Taqsima Business Development and Customer Value tal-Bank, is-seminar iffoka fuq każi ta’ theddid ċibernetiku li jseħħu fil-ħajja ta’ kuljum – minn emails ta’ phishing għal frodi magħmula permezz ta’ Intelliġenza Artifiċjali. Speċjalisti tal-BOV fil-Pagamenti, il-Kards u s-Sigurtà tal-Informazzjoni tkellmu fid-dettall dwar diversi oqsma kritiċi. Il-kelliema offrew strateġiji prattiċi dwar kif iseħħu s-sigurtà tal-informazzjoni u jiddefendu l-operat tagħhom mill-frodi. Il-parteċipanti ngħataw ukoll suġġerimenti dwar kif għandhom jiġu identifikati tattiċi ta’ ingann komuni u kif għandhom jisalvagwardjaw bl-aħjar mod il-pagamenti.
Biż-żieda fit-tranżazzjonijiet diġitali, in-negozji qed jiffaċċjaw theddid dejjem akbar, inkluż meta scammers b’qerq jagħmluha ta’ impjegati tal-bank. Dawn spiss jinvolvu kriminali li jaġixxu bħala impjegati tal-bank biex iqarrqu bil-vittmi biex jiżvelaw informazzjoni finanzjarja sensittiva. Is-seminar enfasizza l-importanza li wieħed jagħraf meta tixgħel il-bozza l-ħamra, l-adozzjoni ta’ protokolli ta’ sigurtà b’saħħithom, u t-trawwim ta’ kultura ta’ sensibilizzazzjoni ċibernetika fi ħdan it-timijiet. L-avveniment intemm b’sessjoni interattiva ta’ mistoqsija u tweġiba li tat lil dawk li attendew l-opportunità li jqajmu it-tħassib tagħhom u jiksbu parir mingħand l-esperti dwar il-protezzjoni tan-negozji tagħhom mit-theddid ċibernetiku.
Il-Bank of Valletta jħeġġeġ lil kull min jissuspetta li waqa’ għal xi scam biex jirrapportaha billi jċempel + 356 2131 2020.
