Il-Fondazzjoni Farsons ikkonfermat mill-ġdid l-impenn fit-tul tagħha għall-konservazzjoni u l-edukazzjoni ambjentali bis-sussidjar tal-Park Naturali u Storiku tal-Majjistral, l-ewwel Park Nazzjonali ta’ Malta.
Tul perjodu ta’ tliet snin, il-Fondazzjoni pprovdiet kontribut sinifikanti għall-proġett tal-Park tal-Majjistral, billi appoġġjat inizjattivi li jqarrbu l-missjoni u l-objettivi tal-Fondazzjoni Farsons relatati mal-ħarsien tal-ambjent, is-sostenibbiltà u l-edukazzjoni. L-aħħar fażi ta’ dan l-appoġġ, riċentament ġiet trasferita lill-proġett tal-Park tal-Majjistral, u b’hekk timmarka l-konklużjoni ta’ dan il-programm importanti ta’ sussidju.
Biex jaraw aktar mill-qrib l-impatt tal-investiment, dan l-aħħar saret żjara fil-Park tal-Majjistral immexxija mis-Sur Louis A. Farrugia, iċ-Chairman tal-Fondazzjoni Farsons, flimkien ma’ membri tal-Bord tal-Amministraturi. F’din iż-żjara, id-delegazzjoni ltaqgħet mat-tim tal-Park tal-Majjistral u rat il-progress qawwi li qed isir madwar il-Park, u l-użu effettiv u responsabbli tal-fondi li qed tgħaddi l-Fondazzjoni.
L-appoġġ tal-Fondazzjoni Farsons kien immirat, b’mod speċifiku, għall-iżvilupp u t-titjib ta’ faċilitajiet li se jintużaw mill-istudenti u ż-żgħażagħ waqt żjarat edukattivi fil-Park. Dawn il-faċilitajiet għandhom irwol ewlieni biex l-iskejjel u gruppi oħra ta’ tagħlim jaħdmu b’risq l-ambjent naturali ta’ Malta b’mod strutturat, prattiku u sinifikanti.
“Il-Fondazzjoni Farsons kburija li ssieħbet mal-Park tal-Majjistral fi proġett b’benefiċċji ambjentali fit-tul u li jispira lill-ġenerazzjonijiet futuri biex japprezzaw, jipproteġu u jitgħallmu mill-wirt naturali ta’ Malta,” qal is-Sur Louis A. Farrugia.
Il-Park Naturali u Storiku tal-Majjistral qiegħed fil-Majjistral ta’ Malta u jinkludi medda ta’ sitt kilometri kosta u nħawi oħra rikki fil-wirt naturali, kulturali u storiku. Il-Park jagħmel parti mis-siti Natura 2000 ta’ importanza ekoloġika internazzjonali u jinkludi abitati uniċi, irdumijiet kostali, pajsaġġi rurali, u strutturi ta’ wirt restawrati.
Fl-aħħar snin, il-Park tal-Majjistral wettaq inizjattivi kbar, fosthom ir-restawr ta’ binjiet ewlenin fil-Barracks ta’ Għajn Tuffieħa, sforzi estensivi ta’ tħawwil ta’ eluf ta’ siġar indiġeni, restawr tal-abitati bit-tneħħija ta’ speċi invażivi, u programmi kontinwi ta’ edukazzjoni u kuxjenza fil-komunità għall-iskejjel, il-familji u l-għaqdiet.