Wednesday, March 27, 2024

Il-Ġappun mistenni jaċċetta aktar turisti kuljum biex isaħħaħ l-ekonomija

Brian Gatt
Brian Gatt
Ġurnalist

Aqra wkoll

L-uffiċjali Ġappuniżi jistgħu jkunu qegħdin ikomplu jnaqqsu l-kontrolli fuq il-fruntieri għal vjaġġaturi barranin f’tentattiv biex tingħata spinta lill-ekonomija tal-pajjiż.

Il-Viċi Kap u Segretarju tal-Kabinett Seiji Kihara qal lit-televiżjoni lokali li l-fatt li ddgħajfet il-munita yen kien l-aktar mod effettiv biex jiġu attirati aktar turisti lejn il-pajjiż.

Il-yen, il-ġimgħa li għaddiet niżlet fl-inqas livell meta mqabbla mad-dollaru Amerikan għal dawn l-aħħar 24 sena.

Seiji Kihara qal li l-limitu ta’ kemm jidħlu turisti ta’ kuljum jista’ jiġi emendat fil-“futur mhux daqshekk imbiegħed”.

Il-Ġappun waqqaf il-biċċa l-kbira tal-viżitaturi barranin għal dawn l-aħħar sentejn fost miżuri oħra biex inaqqas it-tixrid tal-virus tal-Covid-19.

Is-sena l-oħra, viżitaturi barranin saħansitra ġew ipprojbiti mil-Logħob Olimpiku ta’ Tokjo tal-2020.

Madankollu aktar kmieni dan ix-xahar in-numru ta’ turisti barranin li tħallew jidħlu fil-pajjiż żdied minn 20,000 għal 50,000 kuljum. Barra minn hekk dawn it-turisti ma baqgħux meħtieġa jivvjaġġaw bi gwida.

Rapporti oħra qed jissuġġerixxu li l-gvern saħansitra jista’ jneħħi għalkollox il-limitu tal-wasliet aċċettati kuljum fil-pajjiż.

Id-dollaru Amerikan kompla jissaħħaħ meta mqabbel ma’ muniti oħra hekk kif l-investituri żemmew għajnejhom fuq iż-żidiet fir-rati tal-imgħax tal-Bank Ċentrali Amerikan.

Ekonomija

Sport