Il-Pulizija uffiċjalment għalqet l-investigazzjoni tagħha dwar is-Segretarju tat-Taqsima tat-Trasport, Marittima u Avjazzjoni tal-GWU u kkonfermat li mhu se tittieħed l-ebda azzjoni oħra kontrih.
Il-każ qam wara komunikazzjoni li s-Segretarju tat-Taqsima bagħat lill-membri tal-GWU impjegati mar-Resource Support and Services Ltd (RSSL) fid-29 ta’ Mejju 2026 – dakinhar li fih kien hemm is-silenzju elettorali. Dak iż-żmien, in-negozjati dwar il-ftehim kollettiv bejn il-GWU u l-management tal-RSSL kienu għadhom għaddejjin u l-ftehim kien għadu mhux iffirmat.
Diversi membri għamlu kuntatt dirett mal-GWU wara li rċevew korrispondenza mill-management tal-kumpanija dwar l-istat ta’ dawk in-negozjati. Kien hawnhekk li s-Segretarju tat-Taqsima aġġornahom dwar il-pożizzjoni attwali. Din il-komunikazzjoni kienet limitata għal kollox għal kwistjonijiet ta’ xogħol u ma kien fiha l-ebda kontenut politiku ta’ ebda tip.
Wara rapport kriminali mressaq mill-Kummissjoni Elettorali, is-Segretarju tat-Taqsima kien interrogat taħt twissija mid-Dipartiment tal-Investigazzjonijiet Kriminali (CID) fi ħdan il-Korp tal-Pulizija ta’ Malta. Fil-pront, il-GWU kienet ħarġet stqarrija pubblika biex tiddefendih u uffiċjalment innotifikat lill-Konfederazzjoni Ewropea tat-Trade Unions (ETUC) b’dak li kien seħħ.
Il-pulizija issa għalqet il-fajl tal-każ. Il-GWU tilqa’ b’sodisfazzjon kbir dan l-eżitu. Dan jikkonferma preċiżament dak li l-unjoni sostniet sa mill-bidu nett: jiġifieri li segretarju ta’ trade union li jaġġorna lil sħabu dwar l-istat tal-ftehim kollettiv tagħhom ma jwettaq l-ebda reat. Din hija funzjoni protetta bil-liġi.
Il-pulizija kellha l-obbligu li tinvestiga ladarba rċeviet rapport formali, u l-GWU qatt ma sostniet mod ieħor. L-investigazzjoni ħadet il-kors tagħha u s-Segretarju tat-Taqsima m’għadux aktar taħt theddida ta’ proċeduri kriminali kontrih.
Madankollu, il-prinċipju fundamentali li fuqu qam dan il-każ għadu jgħodd. Minn meta tressqet il-kwerela sa meta ngħalqet l-investigazzjoni, is-Segretarju tat-Taqsima kellu jaħdem taħt theddida ta’ prosekuzzjoni kriminali sempliċiment talli wettaq funzjoni ta’ trejdunjonista. Kull uffiċjal ta’ trade union f’Malta kien qed jiffaċċja l-istess inċertezza: dik li jekk jikkomunika mal-membri tiegħu waqt perjodu elettorali, anke jekk fuq materji purament ta’ xogħol, jista’ jkun espost għal proċeduri kriminali. Din hija inċertezza li bl-ebda mod ma tista’ titħalla tippersisti.
Is-Segretarju Ġenerali tal-GWU, Kevin Camilleri, iddikjara:
“Is-Segretarju tat-Taqsima tagħna ġie meħlus minn kull suspett u aħna kuntenti ħafna b’dan. Madankollu, hu qatt ma messu tqiegħed taħt investigazzjoni fl-ewwel lok. Segretarju ta’ unjoni li jgħid il-fatti lill-membri tiegħu dwar il-ftehim kollettiv tagħhom ma jkun qed iwettaq l-ebda reat. Il-pulizija stess issa kkonfermat dan. Bħala GWU se nkomplu nkunu ta’ tarka għall-uffiċjali tagħna meta dawn jaġixxu fil-parametri tal-mandat tagħhom, u se nkomplu niddefendu d-drittijiet trejdunjonistiċi f’kull livell u forum possibbli.”
Id-dritt tat-trade unions li jikkomunikaw mal-membri tagħhom dwar in-negozjar kollettiv huwa protett bis-saħħa taħt il-Konvenzjoni Nru 87 tal-ILO dwar il-Libertà ta’ Assoċjazzjoni u l-Protezzjoni id-Dritt għall-Organizzazzjoni, il-Konvenzjoni Nru 98 tal-ILO dwar id-Dritt għall-Organizzazzjoni u n-Negozjar Kollettiv, kif ukoll il-Konvenzjoni Nru 135 tal-ILO dwar ir-Rappreżentanti tal-Ħaddiema – li kollha kemm huma huma ratifikati minn Malta. Il-korpi superviżorji tal-ILO konsistentement saħqu li t-trade unions għandhom ikunu ħielsa li jwettqu l-funzjonijiet rappreżentattivi leġittimi tagħhom mingħajr ebda indħil min-naħa tal-awtoritajiet pubbliċi.
Il-GWU diġà infurmat lill-Konfederazzjoni Ewropea tat-Trade Unions dwar dan il-każ. Issa se tkun qed issegwi l-materja fil-fora internazzjonali adegwati, inkluż fil-Kumitat tal-ILO dwar il-Libertà ta’ Assoċjazzjoni, sabiex tiżgura li rapport ta’ din in-natura kontra uffiċjal ta’ trade union jitniżżel fir-reġistru u l-kronaka internazzjonali.
Bl-istess mod, il-GWU qed tappella lill-awtoritajiet kompetenti biex jiċċaraw, kemm permezz ta’ azzjoni leġiżlattiva jew regolatorja, li d-dispożizzjonijiet tal-jum ta’ silenzju elettorali m’għandhomx japplikaw għal komunikazzjoni interna ta’ trade union dwar negozjar kollettiv u kwistjonijiet ta’ xogħol u impjieg. L-uffiċjali tal-unions għandhom ikunu f’pożizzjoni li jaqdu lill-membri tagħhom mingħajr ebda inċertezza dwar jekk ix-xogħol tagħhom waqt perjodu elettorali jġorrx miegħu riskju ta’ proċeduri kriminali.
Il-GWU tinsab magħquda wara s-Segretarju tat-Taqsima tagħha. Se tkompli taġġorna lill-membri tagħha dwar kull materja li tolqot l-impjieg tagħhom u se tkompli twettaq dmirha bħala trade union mingħajr biża’.
