Il-Kabinett tal-Ministri jesprimi l-fiduċja sħiħa tiegħu fid-deċiżjoni tal-Prim Ministru li ma jaċċettax ir-riżenja tal-Ministru għall-Intern, is-Sigurtà u x-Xogħol Byron Camilleri.
Il-Kabinett iqis l-offerta ta’ riżenja tal-Ministru Camilleri bħala sinjal ta’ responsabbiltà. Fl-istess waqt, il-Kabinett esprima l-fiduċja tiegħu fil-Ministru għall-Intern, is-Sigurtà u x-Xogħol li dejjem qeda l-irwol tiegħu b’korrettezza u integrità, inkluż f’dan il-każ partikolari. Il-ħidma ssarrfet f’investiment kontinwu fil-korpi dixxiplinati, soluzzjonijiet konkreti għall-immigrazzjoni rregolari u ġlieda aktar b’saħħitha kontra l-kriminalità.
Il-prijorità tal-Gvern f’dawn iċ-ċirkostanzi hija li jkomplu jsiru l-isforzi kollha possibbli, bir-riżorsi kollha li hemm bżonn, sabiex il-Korp tal-Pulizija jsolvi dan il-każ, dawk responsabbli jaffaċċjaw il-ġustizzja malajr kemm jista’ jkun u tkun magħrufa l-verità kollha.
Il-Gvern iħares ’il quddiem għall-konklużjonijiet tal-inkjesta amministrattiva sabiex jiġu stabbiliti l-fatti li seħħew f’dan il-każ u r-rakkomandazzjonijiet li joħorġu mir-rapport.
Fl-aħħar nett, il-Gvern jappella biex f’dawn il-mumenti jkun hemm kawtela u responsabbiltà, u ma jkun hemm l-ebda aġir jew kliem li jista’ jfixkel l-investigazzjonijiet.
