Il-Konsulat Ġenerali ta’ Malta f’Sydney jesprimi l-awguri u l-ferħ tiegħu lill-Eminenza Tiegħu l-Kardinal Mario Grech, Segretarju Ġenerali tas-Sinodu tal-Isqfijiet, fl-okkażjoni tal-għoti ta’ Dottorat Onorarju fit-Teoloġija mill-Università ta’ Notre Dame Australia.
Fuq stedina tal-Università, il-Kardinal Grech qed jagħmel żjara uffiċjali fl-Awstralja bejn it-3 u t-13 ta’ Novembru. Matul din iż-żjara, huwa se jkun qed iżur diversi bliet, fosthom Sydney, Melbourne, Fremantle u Broome.
Il-programm taż-żjara jinkludi diversi impenji u laqgħat li jiffukaw fuq temi importanti għall-ħajja u l-missjoni tal-Knisja, fosthom is-sinodalità, it-tmexxija u l-governanza tal-Knisja, ir-responsabbiltà kondiviża u d-djalogu.
F’Sydney, il-Konslu Ġenerali ta’ Malta, Anneliese Sammut, attendiet għaċ-ċerimonja uffiċjali tal-għoti tad-Dottorat Onorarju, li saret fil-Kripta tal-Katidral ta’ Santa Marija.
Iċ-ċerimonja ġiet segwita minn ikla uffiċjali organizzata mill-Arċisqof ta’ Sydney, l-Eċċellenza Tiegħu Monsinjur Anthony Fisher OP.
Dan ir-rikonoxximent akkademiku lill-Kardinal Mario Grech huwa xhieda tal-kontribut tiegħu fil-qasam tat-teoloġija u fit-tmexxija tal-Knisja universali, kif ukoll tal-ħidma tiegħu favur il-promozzjoni tas-sinodalità, id-djalogu u r-responsabbiltà kondiviża fil-ħajja tal-Knisja.
Il-Konsulat Ġenerali ta’ Malta f’Sydney jingħaqad ma’ dawk kollha li qed jifirħu lill-Kardinal Grech għal dan l-unur prestiġjuż u jawguralu aktar suċċess fil-ħidma pastorali u ekkleżjali tiegħu.