Terremot b’qawwa ta’ 5.7 fuq l-iskala Richter heżżeż iċ-ċentru tal-Ġappun, u kkawża ġrieħi lil mill-inqas 22 persuna. It-theżżiża seħħet fis-sigħat bikrin tal-Ħadd, u nħasset f’diversi żoni tal-pajjiż.
Skont rapporti, l-aktar żoni milquta kienu l-prefetturi ta’ Aichi u Shizuoka, fejn ġew irrappurtati ħsarat f’bini u oġġetti li waqgħu minħabba t-theżżiża.
Minkejja l-ħsarat u l-persuni midruba, ma nħarġet l-ebda twissija għal tsunami. Sadanittant, l-awtoritajiet Ġappuniżi qed iżommu s-sitwazzjoni taħt osservazzjoni u qed iwissu li jistgħu jseħħu aktar terremoti qawwija fil-jiem li ġejjin.
Il-Ġappun huwa wieħed mill-pajjiżi l-aktar esposti għat-terremoti fid-dinja, minħabba l-pożizzjoni tiegħu f’żona fejn jiltaqgħu diversi pjanċi tettoniċi.
