Il-partit fil-Gvern fl-Armenja, li jappoġġja l-Ewropa, rebaħ l-elezzjoni parlamentari li saret fi tmiem il-ġimgħa li għaddiet.
Ir-riżultati finali f’dan il-pajjiż urew li l-partit Civil Contract tal-Prim Ministru Nikol Pashinyan kiseb maġġoranza żgħira filwaqt li l-alleanza Strong Armenia, immexxija mill-biljunarju Russu-Armen Samvel Karapetyan, kisbet 25% tas-siġġijiet fil-Parlament.
Dan ir-riżultat, li x’aktar se jintlaqa’ tajjeb fi Brussell iżda mhux daqstant f’Moska, se jsaħħaħ il-pożizzjoni ta’ Pashinyan hekk kif ikompli jsegwi l-għan ewlieni u politikament sensittivi tiegħu: ftehim ta’ paċi mal-Ażerbajġan u n-normalizzazzjoni tar-relazzjonijiet mat-Turkija.
“Il-poplu tal-Armenja vvota għall-paċi, għall-prosperità reġjonali u għall-kooperazzjoni reġjonali, u nittama li dan jintlaqa’ b’rispons pożittiv mit-Turkija u mill-Ażerbajġan,” qal Pashinyan fil-Kwartieri Ġenerali tal-kampanja tiegħu hekk kif ir-riżultati bdew jaslu gradwalment.
Pashinyan żied jgħid li l-Armenja se tkompli ssaħħaħ ir-rabtiet tagħha mal-punent filwaqt li żżomm is-sħubija tagħha fl-Unjoni Ekonomika Ewrasjatika mmexxija mir-Russja.
