Il-President tat-Tuneżija keċċa lill-Prim Ministru u ssospenda l-Parlament, wara li saru diversi protesti vjolenti madwar il-pajjiż.
Nhar il-Ħadd, eluf ta’ dimostranti rrabjati għall-immaniġġjar ħażin tal-gvern b’rabta mas-sitwazzjoni tal-Covid-19 ħarġu fit-toroq.
Il-President Kais Saied ħabbar li se jkun qed jieħu ħsieb bl-għajnuna ta’ Prim Ministru ġdid, u qal li kellu l-intenzjoni li jġib il-kalma fil-pajjiż.
Wara laqgħa ta’ emerġenza, f’indirizz televiżiv is-Sur Saied: “Aħna ħadna dawn id-deċiżjonijiet … sakemm il-paċi soċjali terġa’ lura fit-Tuneżija u sakemm insalvaw l-istat.”
Hekk kif ingħatat l-aħbar li l-Prim Ministru Hichem Mechichi kien tkeċċa, id-dimostranti bdew jiċċelebraw.
