Il-Klabb Kotba Maltin għadu kemm ippubblika Iljieli bla rqad u rakkonti qosra oħra ta’ Sergio Grech.
Din hija l-ewwel ġabra ta’ stejjer qosra ta’ Sergio Grech li tesplora l-bniedem fis-sens wiesa’. L-istejjer huma dwar bnedmin tad-demm u l-laħam li ħafna drabi huma mimlija dubji u inċertezzi quddiem il-ħajja.
Il-protagonisti f’din il-ġabra aktarx huma l-emarġinati u dawk li rarament jitilgħu rebbieħa fuq il-palk tal-ħajja. Fil-kitba tinħass ukoll l-għajta għall-ġustizzja soċjali.
Uħud mill-istejjer għandhom sfond storiku u jevalwaw lil Malta li jaf Grech.
Il-Professur Ġorġ Mallia sostna li “Dawn huma kitbiet li jidħlu fil-fond tal-ħsieb u l-ħsus. Kitbiet li jwasslu tant ideat. Tant bnedmin. Tant mumenti li se jibqgħu mal-qarrejja.”
