Wara waqfa ta’ seba’ ġimgħat minħabba t-Tazza tad-Dinja 2002, illum jirritorna l-Kampjonat Taljan bl-aktar partita li tispikka tkun dik bejn Inter u Napoli, b’dawn tal-aħħar qed jillidjaw il-klassifika b’vantaġġ ta’ tmien punti fuq l-eqreb rivali Milan.
Inter v Napoli – Bla dubju din hija l-aktar logħba attraenti ta’ dan il-programm.
Il-leaders Napoli qed igawdu vantaġġ sostanzjali fil-quċċata iżda wieħed irid jara jekk hux se jibqgħu jżommu l-konsistenza wara din il-waqfa twila.
Din hija partita ferm diffiċli għall-Partenopei kontra team li xejn għajr minn rebħa ma tissodisfa l-kriterji tagħhom jekk iridu jibqgħu jisfidaw għar-rebħ tat-titlu.
Il-coach ta’ Napoli, Luciano Spalletti, għandu l- iskwadra kollha għad-dispożizzjoni filwaqt li Inter se jkollhom jgħaddu mingħajr is-servizzi tal-imweġġgħin Stefan De Vrij u Marcelo Brozovic.
Salernitana v Milan – Iċ-champions renjanti, Milan, imorru jilagħbu għand Salernitana f’dik li hija meqjusa bħala waħda delikata.
Iżda rebħa hija imperattiva għar-Rossoneri fit-tenattiv li ma jaqtgħux il-pass ma’ Napoli minħabba li jinsabu tmien punti ‘l bogħod.
Salernitana jinsabu trankwilli f’nofs il-klassifika bi 17-il punt u ma għandhom l-ebda pressjoni fuqhom u għaldaqstant jinżlu bi pjan prudenti.
Milan se jkunu mingħajr Zlatan Ibrahimovic, Ante Rebic, Mike Maignan, Alessandro Florenzi u Divock Origi minħabba li qed jirkupraw minn injury.
Luigi Sepe, Giulio Maggiore u Pasquale Mazzocchi huma neqsin għal Salernitana minħabba l-istess raġuni.
Cremonese v Juventus– Juventus jibdew favoriti li jiksbu t-tliet punti meta jmorru jilagħbu għand Cremonese.
Il-club tal-Bianconeri, matul dawn l-aħħar ġimgħat għadda minn turbulenza qawwija b’bosta rinżenji tal- amminstrazzjoni wara llegalitajiet fis-swieq tat-trasferimenti.
Qabel il-waqfa tal-kampjonat, Juventus kien għaddejin minn sensiela ta’ riżultati pożittivi li tellgħuhom fit-tielet post tal-klassifika.
Għal din il-partita, huma se jkollhom bosta players neqsin fosthom Dusan Vlahovic, Juan Cuadrado, Paul Pogba, Leonardo Bonucci u Kaio Jorge.
Lecce v Lazio – Din hi logħba li Lazio iridu jirbħu akkost ta’ kollox.
Huma qed jaqsmu r-raba’ post tal-klassifika flimkien ma’ Inter u għalhekk il-coach, Maurizio Sarri, qed jimmira għall-kwalifikazzjoni tal-UEFA Champions League.
L-avversarji huma Lecce li sa ċertu punt jinsabu xi ftit trankwilli fil- klassifika meta kisbu 15-il punt minn daqstant logħbiet.
Iż-żewġ coaches rispettivi mistennija jutilizzaw l-aqwa formazzjoni possibbli minħabba li l-players kollha huma għad-dispożizzjoni.
