Minn Cristian Muscat
Illum tintlagħab l-40 edizzjoni tas-Super Cup li se tlaqqa’ lir-rivali eterni, iċ- champions Floriana u r-rebbieħa tal-FA Trophy Valletta.
Il-konfront bejn daawn iż-żewġ ġganti tal-football Malti huwa meqjus bħala d-Derby ta’ Malta u għaldaqstant mistennija attendenza kbira fl-Istadium Nazzjonali.
Bla dubju, din hija partita bilanċjata hekk kif id- differenza ta’ bejniethom fil-kampjonat hija ta’ punt wieħed biss.
Filwaqt li Floriana jinsabu fil-quċċata tal-klassifika b’10 punti, Valletta għandhom disa’ punti.
Il-Beltin jistgħu jiftaħru li huma rebħu l-aktar darbi dan l-unur b’total ta’ 13 filwaqt li Floriana żammewha darbtejn fil-vetrini tagħhom.
Barra minn hekk Valletta tilfu sitt finali filwaqt li Floriana sfaw megħluba tliet darbiet.
Din hija t-tielet finali bejniethom hekk kif rebħu waħda kull wieħed.
Kienu l-Greens li rebħu l-ewwel finali – dik ta’ nhar is-6 ta’ Ġunju, 1993 – bl-iskor ta’ 4-1.
Kim Wright u Charles Sciberras skorjaw doppjetta kull wieħed filwaqt li Nicky Saliba wieġeb għal- Lilywhites.
Imbagħad, ir-rebħa Beltija waslet nhar is-16 ta’ Awwissu, 2011, bl-iskor ta’ 3-0 bil-protagonista jkun Michael Mifsud li rreġistra hat-trick.
Illum iż-żewġ timijiet huma armati sa snienhom u ma tkun l-ebda sorpriża jekk din il-finali tiġi deċiża bl-għoti tal-penalties.
Dan minħabba li xejn ma hemm differenza bejn il-Ħodor u l-Bojod fejn il-partita tista’ tintrebaħ f’nofs il-ground … bis-surmastrijiet ikunu l-Ispanjol, Federico Varela Escudero, għal Floriana u Brandon Diego Paiber għal Valletta.
Għaldaqstant, żball wieħed jista’ jkun determinanti hekk kif iż-żewġ settijiet ta’ players mhux se jagħtu nifs lill-avversarji rispettivi.
Il-coach Portugiż ta’ Floriana għandu rekord bilanċjat fil-kampjonat kontra Valletta meta minn erba’ partiti … rebaħ waħda, tilef waħda filwaqt li t-tnejn l-oħra spiċċaw fi draws.
Min-naħa tal-coach ta’ Valletta, Thane Micallef, li kellu żewġ avventuri magħhom … għandu rekord ta’ rebħa, tliet draws u żewġ telfiet kontra l-Furjaniżi.
U mbagħad waqt li kien coach ta’ Gudja United, tilef it-tliet partiti għad-dispożizzjoni.
