It-tkabbir ekonomiku u l-inflazzjoni huma marbuta ma’ xulxin mill-qrib. Inflazzjoni moderata tista’ tiffaċilita t-tkabbir, iżda inflazzjoni għolja spiss tnaqqsu, u b’hekk toħloq bilanċ delikat għal dawk li jfasslu l-politika ekonomika.
L-inflazzjoni u l-għoli tal-prezzijiet huma ftit mill-fatturi ekonomiċi li l-aktar jaffettwaw il-ħajja ta’ kuljum tan-nies. Fi żmien meta l-inflazzjoni tibda togħla, il-prezzijiet tal-prodotti u s-servizzi jogħlew ukoll, u dan ifisser li bl-istess ammont ta’ flus tixtri inqas minn qabel.
Għalhekk, meta l-inflazzjoni tonqos u tibqa’ taħt kontroll, dan iġib miegħu numru ta’ benefiċċji għall-familji, għan-negozji u fuq kollox għall-ekonomija inġenerali tal-pajjiż.
Ftit tal-jiem ilu l-Uffiċċju Nazzjonali tal-Istatistika ħareġ iċ-ċifri għall-Ġunju ta’ din is-sena, li wrew li r-rata annwali tal-inflazzjoni kif imkejla mill-HICP niżlet għal 2.0 fil-mija, tnaqqis mit-2.1 fil-mija tax-xahar taʼ qabel.
L-ewwel u qabel kollox, jidher li hawn qbil ġenerali li meta l-inflazzjoni tkun aktar baxxa tfisser li li jkun hemm inqas pressjoni fuq il-baġit tal-familji. Meta l-prezzijiet tal-ikel, tal-fjuwil, u ta’ prodotti u servizzi essenzjali jibdew jistabbilizzaw ruħhom, il-familji jkunu jistgħu jippjanaw aħjar l-infiq tagħhom u jħossuhom aktar siguri finanzjarjament. Dan jgħin biex titjieb il-kwalità tal-ħajja, partikolarment għal dawk bi dħul baxx jew medju.
Naqblu wkoll li inflazzjoni stabbli toħloq ukoll aktar fiduċja fl-ekonomija. In-negozji jkunu jistgħu jippjanaw l-investimenti tagħhom b’aktar ċertezza, mingħajr il-biża’ ta’ żidiet kontinwi fl-ispejjeż tal-produzzjoni jew tal-materja prima. Dan jista’ jwassal għal aktar investiment, aktar tkabbir ekonomiku u aktar opportunitajiet ta’ xogħol.
Għal pajjiż-gżira bħal Malta, li primarjament jiddependi ħafna fuq l-importazzjoni u fuq setturi ekonomiċi oħra bħalma hu t-turiżmu u s-servizzi, inflazzjoni kkontrollata hija kruċjali biex tinżamm il-kompetittività. Meta l-ispejjeż jibqgħu stabbli, il-pajjiż ikun aktar attraenti għall-investituri barranin u għan-negozji li jixtiequ jespandu l-operat tagħhom.
Barra minn hekk, stabbiltà fil-prezzijiet tagħti aktar ċertezza lill-ħaddiema u lill-impjegaturi waqt in-negozjati dwar il-pagi. B’mod ġenerali, it-tnaqqis fl-inflazzjoni huwa żvilupp pożittiv għal pajjiżna għax jgħin biex jipproteġi l-poter tal-akkwist tal-familji, isaħħaħ il-fiduċja fl-ekonomija, jinkoraġġixxi l-investiment u jikkontribwixxi għal tkabbir ekonomiku aktar sostenibbli.
Quddiem dan kollu nemmnu li għalkemm jibqgħu sfidi ekonomiċi oħra li jridu jiġu indirizzati, inflazzjoni stabbli hija pedament importanti għal ekonomija b’saħħitha u għal livell ta’ għajxien aħjar għaċ-ċittadini kollha.
