“Peress li aħna żgħar dejjem nippruvaw inħallu effett pożittiv ħafna iktar milli pereżempju MEP Ġermaniż jipprova jagħmel. Dan għaliex MEP Ġermaniż fil-PE huwa wieħed minn kważi 100 MEP minn fost is-705”. Iddikjara dan l-Ewroparlamentari Alex Agius Saliba f’kumment ma’ L-Orizzont b’rabta mal-aħħar statistika li fiha hu sab postu fost l-iktar 35 Ewroparlamentari influwenti. Saħaq li nutli bħala Ewroparlamentari joqgħod jitkellem fuq affarijiet li ma jaffettwawx il-kwalità tal-ħajja tagħhom u għalih huwa privileġġ li jipprova jikseb l-aqwa riżultati għaċ-ċittadini tagħna.
Agius Saliba qal li fil-każ ta’ Malta, sitt Ewroparlamentari minn fost 705 u allura dejjem trid taħdem iżjed biex jirnexxielek tinfluwenza. Madanakollu huwa qalilna li kif turi l-istatistika turi li l-Ewroparlamentari Maltin għandhom livell għoli ta’ influwenza meta kkumparati mal-bqija.
“Għalija wara erba’ snin biss li ġejt afdat biex nirrappreżenta lill-poplu tagħna nkun fost dawk l-aktar influwenti timlieni b’aktar kuraġġ u responsabbiltà. Il-fulkru ta’ kollox huwa li dik l-influwenza tużaha biex tirrappreżenta bl-aqwa mod possibbli d-diversi interessi li jkollna u li rridu nirrappreżentaw minn ħin għall-ieħor f’pajjiżna”, żied jgħid Agius Saliba.
Id-drittijiet tal-ħaddiema, id-drittijiet tal-konsumaturi, id-drittijiet tal-minoritajiet u d-drittjiet diġitali huma fost it-temi li l-Ewroparlamentari jmiss magħhom kuljum. Sostna li ċ-ċavetta hija li tuża l-konnessjonijiet li jkollok biex b’responsabbiltà taħdem għall-aqwa interess tal-poplu Malti u Għawdxi kollu.
Ftit xhur biss bogħod mill-elezzjonijiet tal-Parlament Ewropew staqsejna lil Agius Saliba dwar il-ħidma tiegħu lil hinn minn dawn ir-riżultati li rnexxielu jikseb.
“Se nerġgħu mmorru għand il-poplu biex jagħtina l-fiduċja. Issa ġirja sabiex l-aħħar leġiżlazzjoni u l-aħħar proġetti li nkunu qegħdin naħdmu fuqhom nagħlquhom. Waħda mill-prijoritajiet ewlenin għalija se tkun li nkomplu nżidu l-pressjoni fuq il-Kummissjoni Ewropea biex tagħlaq dwar ir-right to disconnect biex fl-aħħar mill-aħħar il-ħaddiema Ewropej u l-ħaddiema Maltin u Għawdxin kollha jkunu jistgħu jibbenefikaw minn din il-leġiżlazzjoni”, tenna jgħid Agius Saliba.
Fuq livell personali huwa qal li hemm numru ta’ leġiżlazzjonijiet oħra li qed jaħdem fuqhom fosthom il-protezzjoni ta’ tfal u minorenni minn abbuż ta’ materjal pornografiku u abbuż sesswali fuq il-minorenni fuq bażi online li hija leġiżlazzjoni kbira ħafna li trid issib bilanċ bejn numru ta’ drittijiet oħra bħalma huma d-drittijiet tal-privatezza u l-komunikazzjoni.
L-Ewroparlamentari tenna jgħidilna li għad baqa’ ħafna xogħol xi jsir biex titjieb il-kwalità tal-ħajja tan-nies.