Il-mewga ta’ sħana li f’dawn l-aħħar jiem ħakmet partijiet tal-kontinent Ewropew, fortunatament ma kellhiex l-istess impatt fuq pajjiżna. Madanakollu, l-awtoritajiet ħadu miżuri biex b’hekk pajjiżna jinsab lest għal kull eventwalità. Dan għax konxji mill-periklu li jsibu ruħhom faxex differenti tas-soċjetà bħalma huma l-anzjani u persuni b’diżabilità.
M’hemmx dubju li t-tisħin tat-temperaturi klimatiċi huma riżultat tat-tibdil fil-klima. Saħansitra esperti diġà qed ibassru illi s-sħana se tkompli tiżdied tant li l-kontinent Ewropew qed jisħon b’rata aktar mgħaġġla milli kienu jaħsbu l-esperti meterjoloġiċi.
Dan il-fenomenu ta’ tibdil fil-klima, il-parti l-kbira tiegħu hija kaġun tal-attività umana, l-iktar minħabba li għadhom jintużaw il-fjuwils fossili, iż-żejt, il-gass u l-faħam. Ma nistgħu ma nsemmux il-fatt li pajjiżna qed jieħu passi biex jikber u jiżdied l-użu tal-enerġija alternattiva b’mod li jnaqqas kemm jista’ jkun l-emissjonijiet li jniġġsu l-arja.
Dan flimkien ma’ metodi oħra ta’ enerġija alternattiva, fosthom l-inċentivi fix-xiri ta’ sistemi fotovoltajċi sabiex pajjiżna mhux biss ikollu s-sigurtà tal-enerġija imma wkoll jilħaq il-miri ambjentali tiegħu kif imfassla mill-Unjoni Ewropea.
Għalhekk, huwa dmir tiegħi u tiegħek li f’dawn iż-żminijiet, meta qed ikunu organizzati ħafna attivitajiet fuq barra, fosthom BBQs, għandna nkunu responsabbli biżżejjed biex la nħallu ħmieġ warajh u wisq inqas oġġetti li faċilment jistgħu jieħdu n-nar u jħallu konsegwenzi kemm fil-qerda tas-siġar u anke fil-ħidma li jwettqu l-membri tal-Protezzjoni Ċivili.
Għalhekk ukoll, f’dan iż-żmien ta’ sħana kbira, nappellaw biex in-nies jaħsbu f’saħħithom u jieħdu l-prekawzjonijiet kollha meħtieġa biex jipproteġu lilhom infushom mir-raġġi tax-xemx, l-iktar f’ħinijiet imprekattivi tal-ġurnata.
