Il-kontroeżami tat-tabib Adrian Vella jkompli wara ġurnata ddominata minn kontradizzjonijiet bejn ix-xhieda tiegħu fil-Qorti, l-istqarrijiet li ta lill-pulizija fl-2019 u l-verżjoni ta’ Keith Schembri.
It-32 jum tal-ġuri ta’ Yorgen Fenech kien iddominat mix-xhieda tal-eks tabib personali tiegħu, Adrian Vella, b’enfasi fuq il-kontradizzjonijiet bejn dak li qal fil-Qorti u l-istqarrijiet li kien ta lill-pulizija fl-2019, kif ukoll differenzi max-xhieda preċedenti ta’ Keith Schembri.
Vella xehed li kien ilu jaf lill-familja Fenech għal aktar minn 30 sena u li kien qed jikkura lil Yorgen Fenech għall-abbuż tal-kokaina u l-istat mentali tiegħu qabel l-arrest. Huwa rrakkonta kif fil-15 ta’ Novembru 2019 ħa lil Fenech Għawdex biex jistrieħ u jipprova jsib avukat.
Matul l-eżami prinċipali, il-prosekuzzjoni kkonfrontatu ripetutament b’partijiet mill-istqarrija tiegħu tal-2019. F’dik l-istqarrija, Vella kien allegatament qal li Fenech kien “f’ħafna nkwiet, li ried jaħrab minn Malta tant li kellu l-passaport miegħu u kien talab il-parir ta’ Keith Schembri dwar jekk kellux jaħrab. Semmew ukoll referenzi għal dgħajjes, ajruplani privati u destinazzjonijiet bħal Sqallija, il-Messiku, Dubai, Franza u t-Tuneżija. Fil-Qorti, Vella wieġeb diversi drabi li ma jiftakarx dawn il-konversazzjonijiet jew li għadda wisq żmien biex jiftakarhom.
Il-prosekuzzjoni kkonfrontatu wkoll b’partijiet oħra tal-istqarrija fejn kien allegatament qal li Yorgen beda juża l-kokaina minħabba “l-problema li daħal fiha” u li hu kien issuspettah fil-qtil ta’ Daphne Caruana Galizia wara konverżazzjonijiet ma’ Keith Schembri. Minkejja dan, Vella baqa’ jinsisti li qatt ma ddiskuta l-assassinju ma’ Fenech u li l-uniku għan tiegħu kien li jgħinu jirkupra mill-vizzju.
Il-Qorti rat ukoll li Vella kien qal li Fenech stqarr: “Jekk ninżel jien, jinżel miegħi.” Madankollu, Vella sostna li qatt ma fehem din il-frażi bħala ammissjoni li Keith Schembri kien involut fil-qtil, iżda li Fenech kien qed jistenna l-għajnuna tiegħu.
Waqt il-kontroeżami, l-avukat Giannella de Marco enfasizzat aktar inkonsistenzi dwar il-kronoloġija tal-vjaġġ lejn Għawdex, min ċempel lil min u t-telefonati ma’ Keith Schembri. Vella qal diversi drabi li ma setax jiftakar min beda l-kuntatt jew is-sekwenza eżatta tal-avvenimenti, iżda kkonferma li informa lil Keith Schembri li kien qed jieħu lil Fenech Għawdex.
Id-difiża kkonfrontatu wkoll bix-xhieda preċedenti tiegħu li Fenech seta’ kien ta’ periklu għalih innifsu. Vella insista li ma kienx suwiċidali u, wara li ġie mfakkar fl-istqarrija tal-2019, ikkonferma li kien tah tliet pilloli Ativan qabel ħallieh waħdu Għawdex.
Punt ieħor ta’ kuntrast kien l-erba’ dokumenti li Vella qal li ġabar mid-dar ta’ Keith Schembri u wassalhom lil Fenech. Filwaqt li Vella sostna li Schembri pponta lejn id-dokumenti u qallu jeħodhom, Schembri kien diġà ċaħad din il-verżjoni fix-xhieda tiegħu quddiem il-ġurati.
Il-prosekuzzjoni qed titmexxa mill-avukati tal-Uffiċċju tal-Avukat Ġenerali Godwin Cini, Anthony Vella u Danika Vella, flimkien mal-Assistent Kummissarju Keith Arnaud u l-Ispettur Kurt Zahra.
Id-difiża hija mmexxija mill-avukati Charles Mercieca, Gianella Demarco u Gianluca Caruana Curran. L-avukati Therese Comodini Cachia u Jason Azzopardi qed jidhru parte civile f’isem il-familja Caruana Galizia.
L-Imħallef Edwina Grima qed tippresiedi l-ġuri.
