Minn Cristian Muscat
Kif bdiet l-imħabba tiegħek lejn l-atletika?
Għall-ewwel, mill-2018 sal-2020, jiena kont nittrenja darba fil-ġimgħa, siegħa biss, kull nhar ta’ Sibt il-Marsa bħala parti mill-programm tal-BeActive Sports Malta. Kien sempliċiment mod kif inżomm attiv għax, dak iż-żmien, ma kontx tant imħajjar li nibda sport kompetittiv. F’dan it-taħriġ konna sempliċiment niġru ftit, nagħmlu ċertu movimenti u stretching, u anke f’xi drabi minnhom nittrenja ma’ ommi li wkoll kienet tittrenja taħt il-programm tas-Sports Malta darba fil-ġimgħa.
L-imħabba u l-passjoni vera tiegħi lejn l-atletika bdew iżda waqt li kienu għaddejjin l-kampjonati tas-sajf tal-atletika tal-2021. B’kumbinazzjoni, ommi kienet qiegħda ssuqni għal appuntament il-Marsa fejn għaddejna minn ħdejn it-trakka tal-ġiri bil-karozza. Dak il-ħin ħassejt ġibda qawwi f’qalbi li dan hu s-sport li verament nixtieq nagħmel, u bil-mod il-mod, minn dik is-sena bdejt nittrenja b’mod regolari.
Iddeskriva l-esperjenza preżenti tiegħek fl-atletika.
Bħalissa ninsab f’punt importanti tal-karriera tiegħi bħala atleta. Din is-sena ġabet magħha ħafna bidliet kemm pożittivi, speċjalment wara li biddilt il-kowċ f’nofs aktar kmieni dis-sena li għenitni niskopri kemm verament jiena passjonat fuq das-sport, tatni mentalità ġdida u motivazzjoni akbar biex inkompli nimraħ fl-400m Hurdles u f’dixxiplini oħrajn.
Grazzi għall-kowċ tiegħi Rachid Chouhal, inħoss li issa qiegħed nikkompeti b’aktar kunfidenza, kontroll, u saħħa, filwaqt li nibqa’ naħdem kontinwament biex intejjeb il-prestazzjonijiet tiegħi.
Fl-istess ħin, qed nieħu gost ħafna bil-vjaġġ li għaddej minnu bħalissa, speċjalment grazzi għall-atleti li qiegħed nittrenja magħhom. Hemm atmosfera sabiħa ħafna waqt it-training, fejn kulħadd huwa motivat u determinat waqt it-taħriġ, li din naturalment tagħmel differenza kbira kemm mentalment kif ukoll fil-prestazzjoni.
X’tikkummenta fuq l-aħħar rekord nazzjonali li ksibt?
Li ksirt ir-rekord nazzjonali tal-400m Hurdles, fejn naqqast ir-rekord l-antik tiegħi ta’ 54.53s għal 52.81s kienet ta’ sodisfazzjon kbir ħafna għalija għax kienet riflessjoni diretta tar-reżiljenza mentali tiegħi. Il-ħin ma kinitx l-unika ħaġa li kienet importanti, iżda wkoll il-fatt li rnexxieli nuri lili nnifsi li kapaċi nilħaq livell ħafna ogħla mis-sena l-oħra.
Dak il-mument tani motivazzjoni akbar biex inkompli naħdem u nimmira għal aktar suċċessi fil-futur. Kienet tellieqa li qatt ma ninsa u waħda li għamlitni kburi ħafna bil-passi u d-deċiżjonijiet li ħadt matul din is-sena.
X’suċċessi maġġuri oħra rnexxielek tikseb sa issa f’dan l-isport li tant tħobb?
Apparti mir-rekords nazzjonali, wieħed mis-suċċessi l-kbar tiegħi kien li rnexxieli nirrappreżenta lil Malta f’kompetizzjonijiet internazzjonali u nikkompeti kontra atleti ta’ livell għoli, bħal-Logħob tal-Pajjiżi ż-Żgħar, il-European Team Championships, u l-World University Games. Dawn l-esperjenzi għenuni nikber kemm bħala atleta kif ukoll bħala persuna.
Inħoss ukoll li suċċess importanti huwa l-mod kif l-atletika bidlitli l-mentalità tiegħi. Għallmitni dixxiplina, paċenzja u reżiljenza, kwalitajiet li jgħinuni mhux biss fl-isport imma fil-ħajja inġenerali.
Kif tqis il-livell tal-atletika f’pajjiżna fil-preżent?
Nemmen li l-livell tal-atletika f’Malta tjieb ħafna fl-aħħar snin. Qed naraw aktar atleti dedikati u prestazzjonijiet dejjem aktar b’saħħithom f’diversi dixxiplini. Dan huwa sinjal pożittiv ħafna għall-futur tal-isport f’pajjiżna.
Madankollu, nemmen li hemm spazju għal aktar żvilupp, speċjalment jekk irridu nikkompetu b’mod aktar konsistenti fuq livell internazzjonali. B’investiment u appoġġ akbar, jiena nemmen li avolja l-atleti Maltin diġà laħqu riżultati tajbin ħafna f’dawn l-aħħar snin, nemmen li jistgħu jilħqu livelli saħansitra ogħla.
U dak tar-riżorsi fejn titħarrġu u jkollkom il-kompetizzjonijiet uffiċjali tagħkom?
Ir-riżorsi tjiebu ħafna meta mqabbla ma’ snin ilu, u napprezza tassew l-isforz li qed isir sabiex l-atleti jkollhom aktar appoġġ u opportunitajiet biex jiżviluppaw. Hemm ħafna nies fil-komunità tal-atletika li jaħdmu b’passjoni kbira biex l-isport ikompli jikber, u dan jidher ċar fil-progress li sar f’dawn l-aħħar snin.
Grazzi wkoll għall-ħidma ta’ Athletics Malta, kif ukoll bit-tnedija tal-Athletes Commission, nemmen li l-vuċi tal-atleti qed tingħata aktar importanza u li qed jinħoloq ambjent aktar professjonali għall-isport.
Kif qed tħares lejn il-futur tiegħek fl-atletika?
Inħares lejn il-futur tiegħi fl-atletika b’ħafna ambizzjoni u ottimiżmu. Naf li għad hemm ħafna xogħol x’isir, iżda nemmen li għandi l-potenzjal inkompli nitjieb u nikseb riżultati akbar fuq livell internazzjonali.
Fl-istess ħin nibqa’ ħerqan li mhux biss niffoka fuq ir-riżultat iżda li naprezza l-proċess u ngawdi l-vjaġġ waqt li nikber bħala persuna permezz tal-isport. L-atletika diġà tatni ħafna esperjenzi sbieħ u nispera li fil-futur inkompli ġieħ lil Malta.
Għaddi messaġġ finali lil min jixtieq jagħmel karriera ta’ suċċess fl-atletika.
Il-messaġġ tiegħi lejn l-atleti huwa sempliċi:
Jekk tħoss ġibda qawwija f’qalbek lejn xi ħaġa li tassew tixtieq tikseb, qatt tipprova tnaqqas jew tinjora dak li tħoss ġewwa fik!
Ħafna mid-drabi, is-subkonxju tiegħek ikun qiegħed imexxik lejn il-persuna li inti tista’ ssir. Għamel il-kuraġġ biex tieħu d-deċiżjonijiet li tħoss li huma tajbin għalik, anke jekk ma jinftiehmux minn kulħadd.
Fl-istess ħin, trid tafda fil-proċess u tibqa’ konsistenti. Is-suċċess fl-atletika ma jiġix mil-lum għal għada, u jkun hemm mumenti diffiċli u ħafna sagrifiċċji. Se jiġu mumenti fejn inti se tiddubita l-kapaċita tiegħek, imma huma wkoll dawn il-mumenti li jistgħu jbiddluk għall-aqwa verżjoni tiegħek bħala persuna. Nemmen li meta atleta jibqa’ leali lejn lilu nnifsu, jafda fil-vjaġġ tiegħu, u jibqa’ jaħdem b’dixxiplina u passjoni, jista’ jilħaq livelli li forsi qatt ma kien jimmaġina.