Roma Club Malta ħatar il-kumitat il-ġdid tiegħu waqt il-Laqgħa Ġenerali Annwali, fejn il-President, Ray Sant, ġie rikonfermat fil-kariga.
Fid-diskors tiegħu, Ray Sant irringrazzja lill-membri kollha preżenti għall-impenn, is-sapport u l-imħabba kontinwa tagħhom lejn il-klabb. Huwa esprima l-emozzjoni tiegħu għar-rikonferma fil-kariga u qal li jħossu onorat li jmexxi klabb bi storja tant unika, hekk kif Roma Club Malta huwa l-ewwel supporters club uffiċjali ta’ AS Roma mwaqqaf barra l-belt ta’ Ruma. Il-klabb ġie mwaqqaf fl-1 ta’ Frar 1973 u din is-sena qed ikompli jsaħħaħ il-wirt u t-tradizzjoni tiegħu.
Il-President ħabbar ukoll li, mill-istaġun li ġej, il-membri u s-supporters kollha se jkunu jistgħu jsegwu l-logħbiet ta’ AS Roma fil-False Nine Bar & Dine, Triq Sir Adrian Dingli, Pembroke PBK 1940. Huwa ddeskriva l-lokal bħala spazju modern u komdu, b’atmosfera mill-aqwa u b’offerta gastronomika ta’ livell għoli, li se jservi bħala d-dar il-ġdida tas-supporters waqt il-logħbiet.
Min-naħa tiegħu, is-Segretarju Ġenerali Robert Busuttil qal li jinsab ottimist ħafna għall-futur tal-klabb u esprima l-fiduċja tiegħu li, bl-appoġġ kontinwu tal-membri, Roma Club Malta se jkompli jikber u jissaħħaħ dejjem fl-aħjar interess tal-komunità Romanista f’Malta.
Matul il-laqgħa tħabbar ukoll ir-rebbieħ tal-premju annwali “Roma Club Malta Player of the Year”, li jingħata kull sena lill-aqwa plejer ta’ AS Roma skont il-vot tal-membri. Għal din is-sena, l-unur mar għand il-goalkeeper Mile Svilar, bħala rikonoxximent għall-prestazzjonijiet eċċellenti tiegħu matul l-istaġun.
Il-Kumitat ta’ Roma Club Malta għall-mandat il-ġdid huwa magħmul minn:
- President: Ray Sant
- Viċi President: Claudio Attard
- Segretarju Ġenerali: Robert Busuttil
- Assistent Segretarju: Mark Galea
- PRO: Simon Zahra
- Teżorier: Ivan Vella
- Assistent Teżorier: Lawrence Bugelli
- Membri responsabbli mill-Attivitajiet Soċjali u Sportivi: Mario Dimech, Mario Borg u Adrian Gomez Blanco
- Awditur: Ray Calleja