Il-President ta’ Ħamrun Spartans FC, Joseph Portelli, ħabbar li xtara klabb Taljan li jilgħab fil-Kampjonat tal-Eccellenza għal €2 miljun.
Huwa qal dan il-Ġimgħa filgħaxija waqt il-Laqgħa Ġenerali Annwali tal-iSpartans.
Għalkemm ma żvelax l-isem tal-klabb, huwa qal li l-klabb għandu tradizzjoni qawwija, segwit min numru kbir ta’ partitarji u li sa ftit snin ilu kien għadu jilgħab fis-Serie A.
Portelli spjega li dan l-investiment se jgħin lill-Ħamrun Spartans jikbru aktar billi joħloq opportunitajiet għal plejers Maltin biex jilagħbu fl-Italja u billi jattira plejers barranin ta’ livell ogħla. Huwa għandu l-għan li jgħin lill-klabb Taljan jitla’ fil-kategoriji tal-futbol Taljan sakemm jilħaq is-Serie C.
Dwar l-istaġun li ġej tal-Ħamrun Spartans, Portelli kkonferma li l-kowċ Giacomo Modica se jibqa’ jmexxi lit-tim tal-anqas fil-bidu tal-istaġun il-ġdid. Huwa faħħar ix-xogħol tiegħu fil-preparazzjoni fiżika tat-tim, li kienet kruċjali biex il-klabb kiseb il-kwalifikazzjoni storika għall-fażi tal-gruppi tal-UEFA Conference League.
Portelli żvela wkoll li l-gowlkeeper Henry Bonello u l-winger Joseph Mbong se jħallu lill-klabb wara li għarrfuh li ma ridux ikomplu jaħdmu taħt Modica. Għalhekk, il-kuntratti tagħhom ma ġewx imġedda.
Il-President wiegħed investiment qawwi fit-tim matul is-sajf, b’baġit ta’ trasferimenti li se jiżdied għal €3.25 miljun. Huwa qal li fil-ġimgħat li ġejjin se jitħabbru diversi akkwisti ġodda, fosthom żewġ wingers. Portelli esprima fiduċja li l-plejers il-ġodda se jgħollu l-livell tat-tim u jgħinu lill-Ħamrun Spartans jerġgħu jiksbu suċċess fil-kompetizzjonijiet Ewropej.
