Bejn illum u għada tintlagħab it-tmien ġurnata tal-BOV Kampjonat Premier fejn, bla dubju, jispikka l-konfront bejn l-ewwel żewġ timijiet, Hibernians u Birkirkara.
Partita oħra interessanti hija dik bejn Floriana u Gżira United filwaqt li ċ-champions Hamrun Spartans jilagħbu kontra Sirens.
Partita oħra li fiha l-importanza tagħha hija dik min-naħa t’isfel tal-klassifika bejn Sliema Wanderers u Mosta.
Birkirkara v Hibernians – Din il-partitissima tiftaħ il-programm fejn mistennija tiġbed l-akbar folla tal-istaġun.
Hibernians jimmiraw li jkabbru s-sensiela tagħhom mingħajr telfa biex fl-istess waqt jiftħu vantaġġ ta’ sitt punti fil-quċċata tal-klassifika.
Min-naħa l-oħra, Birkirkara jimmiraw li jirritornaw lura għar-rebħ wara t-telfa ta’ 3-2 kontra Sirens.
Minkejja li l-Pawlisti ġew miżmuma fi draw ta’ 1-1 minn Valletta xorta waħda żiedu l-vantaġġ għal tliet punti fil-quċċata. Issa l-pressjoni tinsab kollha fuq l-Istripes u jekk iridu jibqgħu jisfidaw għar-rebħ tat-titlu, xejn għajr minn rebħa ma tissodisfa l-kriterji tagħhom biex fl-istess waqt jiftħu beraħ l-isfida għar- rebħ tal-kampjonat.
Iż-żewġ timijiet għandhom il-players kollha disponibbli hekk kif Ryan Scicluna (Birkirkara) u Ferdinado Apap (Hibernians) jirritornaw għall-azzjoni minn sospensjoni.
Valletta v Sta Lucia – Valletta jilagħbu kontra Sta Lucia li għadhom qed ifittxu rebħa.
Huma jinżlu b’moral għoli wara li ġejjin minn riżultat ta’ draw kontra Hibernians grazzi għar-rimonta li għamlu fit-tieni taqsima wara li daħlu jistrieħu fi żvantaġġ ta’ goal.
Fil-veritá dik il-logħba kellha żewġ uċuh għax fl-ewwel taqsima Hibernians kienu l-aħjar team iżda wara l-mistrieħ il-Beltin dehru team trasformat u meritatament kisbu d-draw permezz tas-sostitut, Shaun Dimech.
Min-naħa ta’ Sta Lucia, dawn ġejjin minn draw ta’ mingħajr goals kontra Sliema Wanderers.
U minkejja li gawdew minn superjoritá numerika għal aktar minn siegħa naqsu li jinfdu d-difiża avversarja … biex b’hekk issa ilhom 10 partita mingħajr rebħa.
Huma se jiffaċċjaw team li bħal donnu qed isib il-forma wara bidu nċert fejn il-Lilywhites jibdew favoriti li joħorġu bit-tliet punti.
Telfa għal-Luċjani tħallihom fil-periklu tar-relegazzjoni. Huma se jkollhom lura lid-difensur, Jurgen Pisani, minn sospensjoni.
Hamrun S. v Sirens – Hamrun Spartans jilagħbu kontra Sirens hekk kif iż-żewġ timijiet ġejjin minn rebħa.
Iċ-champions renjanti kisbu rebħa komda ta’ 3-1 kontra Gudja United li poġġiethom fis-sitt post iżda għadhom tmien punti taħt il-leaders Hibernians.
Ispirati minn Matthew Guillaumier, l-Ispartans ipproduċew l-aħjar prestazzjoni tagħhom tal-istaġun, fejn ikkontrollaw l-andament għal ħinijiet twal u qatt ma dehru f’xi periklu li setgħu jitilfu xi punt minn dan il-konfront.
Min-naħa l-oħra, Sirens dawru telfa f’rebħa ta’ 3-2 kontra Birkirkara. Il-perseveranza tagħhom tat il-frott mixtieq b’zewġ goals fi spazju ta’ erba’ minuta li ħasdu lill-Karkariżi bil-konsegwenza li dawn tal-aħħar ikkrollaw fit-tieni taqsima.
B’Sirens jinsabu fit-tielet post tal-klassifika, huma se jkunu mingħajr iż-żewġ players influwenti, Kemar Reid u Degran Jackson, li tkeċċew kontra Birkirkara.
Il-goalkeeper ta’ Hamrun Henry Bonello qed jirkupra minn injury.
Balzan v Gudja U. – Balzan jiltaqgħu ma’ Gudja United hekk kif ġejjin minn rebħa ta’ 2-1 fuq Gzira United wara li għamlu rimonta biex inqalgħu min-naħa t’isfel tal-klassifika.
Huma dehru resqin lejn it-tielet telfa konsekuttiva iżda żewġ goals f’żewġ minuti kkanċellaw il-vantaġġ tal-Maroons. Rebħa kontra Gudja tkun tfisser li l-Balzanin jitilgħu f’żona aktar komda fil-klassifika kif ukoll possibbiltá kbira li jisfidaw għal post fil-kompetizzjonijiet Ewropej.
Gudja ġejjin minn żewġ telfiet infila u għaldaqstant il-pressjoni tinsab fuqhom hekk kif jinsabu punt biss fuq iż-żona l-ħamra.
Iż-żewġ timijiet għandhom player li se jirritorna minn sospensjoni – Augustin Loof għal Balzan u Igor Dudarev għal Gudja.
Floriana v Gzira U. – Din hija logħba bejn żewġ timijiet li huma neqsin mill- konsistenza. Minn seba’ ħarġiet, huma rreġistraw żewġ rebħiet biss. Filwaqt li Floriana kienu miżmuma fi draw ta’ 1-1 minn Mosta, Gzira sfaw megħluba minn 2-1 Balzan.
Iż-żewġ timijiet ma jaffordjawx joħorġu b’idejhom vojta għall-fatt li jridu jibqgħu jżommu kuntatt mat-timijiet ta’ fuq biex ma jinqabdux mal-grupp tar-Relegation Pool.
Din għandha tkun laqgħa bilanċjata u tista’ tmur kull naħa… bl-iċken żball jista’ jkun detrimentali.
Il-Greens jilqgħu lura lil Kristian Keqi minn sospensjoni iżda se jkunu mingħajr Nicolas Garcia u Augusto Caseres għax sospiżi. Sadanittant, id-difensur tal-Maroons, Steve Borg, għadu mweġġa’.
Sliema W. v Mosta – Sliema Wanderers se jerġgħu jkunu taħt il-lenti hekk kif jinsabu fil-qiegħ tal- klassifika mingħajr l-ebda rebħa bil-konsegwenza li huma d-diżappunt ta’ dan l-istaġun.
Huma se jaffrontaw lil Mosta hekk kif iridu jindirizzaw bosta problemi … l-aktar fl-attakk minħabba l-fatt li f’erba’ partiti (minn sebgħa) naqsu li jsibu x-xibka avversarja.
Iżda fid-draw ta’ 0-0 kontra Sta Lucia huma pproduċew wirja mill-aqwa meta b’għaxar players għal aktar min siegħa wara li tkeċċa Danny Holla, rnexxielhom jiksbu punt.
Mosta salvaw punt fid-draw ta’ 1-1 kontra Floriana lejn l-aħħar ħinijiet. Iżda l-Blues jibdew favoriti kontra l-Wanderers li jistgħu jqumu għall-okkażjoni.
Filwaqt li Sliema se jkunu mingħajr is-sospiżi Holla u Dejan Vukovic, Jonas Rodriguez (Mosta) mhux se jilgħab għall-istess raġuni.
