“Kont qed nistenna li l-Gvern iħabbar is-Super Bonus”

Aqra wkoll

Fil-bidu tad-diskors tiegħu fil-replika tal-Budget 2027, il-Kap tal-Oppożizzjoni Dr Alex Borg qal li hu kien qiegħed jistenna li f’dan l-ewwel budget ta’ din il-leġiżlatura jingħata s-super bonus għax din kienet waħda mill-akbar wegħdi fil-kampanja elettorali.

Hawn Dr Borg qal li Gvern Nazzjonalista ġdid se jkun qiegħed ikompli jagħti dan il-bonus għax din hija xi ħaġa tajba.

“Lanqas tixtri kafe u toast biż-żieda fil-pensjoni”

Dr Alex Borg qal li hu kieku jistħi jidher quddiem in-nies hekk il-Prim Ministru għamel kampanja jgħid li se jżid il-pensjoni b’50 ewro, iżda “issa ġie l-budget u żiedhom 10 ewro biss li aktar minn nofshom huma ż-żieda tal-għoli tal-ħajja lill-pensjonanti.”

Dr Borg qal li b’dan il-flus “lanqas tixtri kafe u toast…”

“Gvern għajjien u mingħajr ambizzjoni”

Fir-replika tiegħu għal Budget 2027, Dr Alex Borg qal li l-unika idea kif il-Gvern ikomplu jkabbar l-ekonomija hija li jkomplu jkabbar il-popolazzjoni… Stqarr li f’pajjiżna se jkun hawn madwar 800,000 persuna jgħixu.

Fl-istess waqt qal li Gvern Nazzjonalista għandu l-ideat kif ibiddel l-ekonomija u ma jibqax ikabbar l-istess ekonomija billi jġib aktar nies.

Iżda minkejja dan Dr Alex Borg baqa’ ma ressaq l-ebda proposta kif se jbiddel il-mudell ekonomiku. 

Fid-diskors tiegħu qal li dan hu Gvern għajjien u mingħajr ambizzjoni.

“Ma nistennewx turisti ta’ 5 star meta aħna one star”

Meta ġie biex jitkellem dwar it-turiżmu, Dr Alex Borg qal li kif jista’ jkun nistennew turisti ta’ 5 star meta Malta hija one star?

Qal li hu jaqbel li t-turisti jħallsu taxxa meta jiġu pajjiżna, iżda din ma għandix tkun tgħodd għal perjodi kollha tas-sena.

Dr Borg qal li fil-każ ta’ Għawdex din m’għandiex tgħodd għal Maltin li jżuru l-gżira għax huma l-akbar turisti ta’ din il-gżira.

Edukazzjoni

Il-Kap Nazzjonalista fid-diskors tiegħu kkritika s-sistema edukazzjoni fejn qal li hawn tfal li lanqas jafu l-Malti u lanqas l-Ingliż.

Qal li hu jiskanta kif fil-bidu ta’ sena skolastika t-tfal kienu għandhom bla kotba biex jibdew jitgħallmu u anke skont hu hemm problema kbira fl-LESs. 

Dr Borg qal li hija tal-mistħija kif il-ġenituri qegħdin jitkarbu biex uliedhom ikollhom LESs.

Trasport

Il-Kap Nazzjonalista meta ġie biex jitkellem dwar it-trasport qal li dan il-Gvern jiftaħar kemm qegħdin joħorġu karozzi kuljum. 

Stqarr li fl-istess waqt dan il-budget ma għamel l-ebda referenza għall-propost li tressqu qabel l-elezzjoni ġenerali dwar it-trasport tal-massa.

Dr Borg qal li wara ġurnata xogħol kulħadd ikun irid jasal id-dar fl-inqas ħin u mhux jagħmel ħafna ħin imwaħħal fit-traffiku bit-tama li xi darba jkun jista’ jistrieħ.

Turiżmu li semma fin-negattiv

Dr Alex Borg qal li l-Partit Nazzjonalista nvesta bis-sħiħ f’dan is-settur, iżda issa dan il-Gvern irid isawwat lill-operaturi ta’ dan is-settur.

Staqsa hekk hux il-Gvern qed iġib il-valur lejn pajjiżna u hekk it-turisti li qed jiġu f’pajjiżna humiex ta’ kwalità. 

Dwar l-eco tax Dr Borg qal li hu m’għandu xejn li t-turist jikkontribwixxi lejn il-futur ta’ pajjiżna. Qal li l-Partit Nazzjonalista qed jipproponi li din it-taxxa għandhom tidħol biss fil-perjodu meta jkun hawn ħafna turisti, iżda meta imbagħad il-perjodu ma jkunx hawn ħafna turisti allura din m’għandix tidħol fis-seħħ.

Qal  li ma għandix nippretendu turisti 5 star meta Malta 1 star. 

Dwar Għawdex qal li ħafna mit-turisti huma Maltin u dawn se jiġu ntaxxati. Hawn staqsa hekk din il-propsota ġietx mitkellma mal-imsieħba soċjali.

Għawdex

Il-Kap tal-Oppożizzjoni qal li waqt il-kampanja elettorali l-Prim Ministru għamel kapitlu sħiħ fil-manifest, iżda issa fil-budget ftit li xejn isemma.

Ftit wara Dr Borg qal li f’dan il-budget Għawdex isemma 3 darbiet fost l-oħrajn li se jkun hemm cable biex il-provista tal-elettriklu tkun tal-ogħla kwalità f’Għawdex.

Gvern għajjien… Gvern bla direzzjoni

Dr Borg, qal li dan hu Gvern għajjien… Gvern bla direzzjoni… Gvern li qiegħed iġelled il-ħaddiema flimkien u ma’ min iħaddem… Qal li l-Partit Nazzjonalista hu l-Oppożizzjoni ta’ dan il-Gvern, iżda mhux kontra pajjiżna.

LEAVE A REPLY

Please enter your comment!
Please enter your name here

Sport