minn Cristian Muscat
“L-isfidi huma dawk li jagħmlu l-ħajja interessanti. Li tegħlibhom jagħti tifsira lill-ħajja, iżda li tirbaħhom għal kawża nobbli jagħtik skop.” Din il-frażi tirrifletti perfettament il-missjoni tal-ALIVE Charity Foundation, organizzazzjoni li matul dawn l-aħħar snin saret sinonima ma’ impenn, sagrifiċċju u tama fil-ġlieda kontra l-kanċer.
F’intervista li dan il-ġurnal kellu ma’ Max Borg Bonello, Logistics Manager tal-ALIVE Charity Foundation, ħareġ b’mod ċar kemm il-proġett kiber minn meta beda fl-2013 u kif illum sar wieħed mill-aktar inizjattivi filantropiċi ta’ suċċess f’Malta.
Din is-sena se tkun il-12-il edizzjoni tal-isfida annwali taċ-ċikliżmu organizzata mill-fondazzjoni. Bejn is-27 ta’ Ġunju u t-3 ta’ Lulju, tim ta’ 35 ċiklist se jimbarka fuq sfida ta’ 1,100 kilometru mifruxa fuq sitt ijiem, li tibda fi Bratislava, tgħaddi minn Budapest u Zagreb, u tintemm fi Vjenna.
“Sa issa rnexxielna niġbru €1.1 miljun għall-Università ta’ Malta sabiex jintużaw fir-riċerka dwar il-kanċer,” qal Borg Bonello. “Dan huwa tragward enormi li juri kemm il-poplu Malti jemmen fil-kawża tagħna.”
Il-fondi kollha miġbura mill-ALIVE jgħaddu għand il-Research, Innovation and Development Trust (RIDT) fi ħdan l-Università ta’ Malta. Minn hemm, jinfetħu sejħiet pubbliċi għall-applikazzjonijiet ta’ proġetti ta’ riċerka.
“Jiġu ppreżentati diversi proposti u jkun hemm bord ta’ esperti, ħafna minnhom professuri minn universitajiet barranin, li jevalwaw l-applikazzjonijiet,” spjega Borg Bonello. “Il-proġetti magħżula jingħataw l-għajnuna finanzjarja meħtieġa u l-Università ta’ Malta tieħu ħsieb l-implimentazzjoni tagħhom.”
L-impatt ta’ dawn il-fondi kien kbir. Meta l-ALIVE bdiet il-vjaġġ tagħha aktar minn għaxar snin ilu, ir-riċerka medika dwar il-kanċer f’Malta kienet ferm limitata.
“Dak iż-żmien ir-riċerka prattikament ma kinitx teżisti,” stqarr Borg Bonello. “Kien hemm tagħmir li ma setax jintuża għax ma kienx hemm il-finanzjament meħtieġ. Minn hemmhekk bdejna nibnu pass pass u llum wasalna biex niġbru aktar minn miljun ewro.”
Minkejja dan is-suċċess, il-fondazzjoni m’għandha l-ebda ħsieb li tieqaf.
“Mhux se nieqfu. Għad hemm ħafna xi jsir u rridu nibqgħu nagħtu tama lil dawk kollha li qed jaffaċċjaw il-kanċer u lill-familji tagħhom.”
Interessanti wkoll l-oriġini tal-isem ALIVE. Borg Bonello spjega li l-isem huwa marbut mal-frażi “saving a life”.
“L-isem ALIVE ġej mill-kunċett ta’ salvazzjoni ta’ ħajja. Nemmen ħafna f’din il-filosofija. Dak kollu li nagħmlu huwa mmirat biex ngħinu biex xi darba aktar ħajjiet jiġu salvati permezz tal-avvanzi fir-riċerka.”
Naturalment, sfida ta’ din il-portata ma ssirx mil-lum għal għada. Il-preparamenti fiżiċi huma intensivi u jeħtieġu dixxiplina kbira.
“Iċ-ċiklisti tagħna ilhom madwar 11-il ġimgħa jitħarrġu b’mod regolari,” qal Borg Bonello. “It-taħriġ isir kważi kuljum, filwaqt li s-Sibtijiet u l-Ħdud ħafna drabi jkunu jinkludu sessjonijiet ta’ bejn seba’ u tmien sigħat fuq ir-rota.”
Bħala parti mill-preparamenti, it-tim anke mar Sqallija sabiex jaffaċċja rotot aktar diffiċli u tlajja’ li jixbhu dawk li se jiltaqgħu magħhom matul il-vjaġġ.
“Ma nistgħux niddependu biss fuq it-taħriġ lokali. Irridu noħolqu kundizzjonijiet kemm jista’ jkun simili għal dawk li se niffaċċjaw matul l-isfida.”
Madankollu, il-parteċipanti ma jkollhomx biss l-obbligu li jippreparaw ruħhom fiżikament. Parti essenzjali mill-impenn tagħhom hija l-ġbir tal-fondi.
“Kull ċiklist ikollu wkoll ir-responsabbiltà li jiġbor fondi. Huwa impenn doppju: trid tkun lest fiżikament u fl-istess ħin taħdem biex tqajjem kuxjenza u tikseb l-appoġġ tal-pubbliku.”
Warajhom hemm ukoll kumitat ta’ voluntiera li matul is-sena kollha jorganizza attivitajiet u inizjattivi differenti ta’ ġbir ta’ fondi.
Il-fatt li l-fondazzjoni topera kompletament fuq bażi volontarja huwa wieħed mill-ikbar punti ta’ saħħa tagħha. L-ispejjeż amministrattivi jiġu koperti minn sponsors u mill-parteċipanti nfushom, sabiex kull donazzjoni li ssir mill-pubbliku tmur direttament għar-riċerka.
Dan l-aspett, skont Borg Bonello, huwa wieħed mir-raġunijiet ewlenin għaliex il-poplu Malti kompla juri fiduċja kbira fil-proġett.
“Meta n-nies jagħtu donazzjoni, ikunu jafu li l-flus tagħhom se jmorru direttament għal din il-kawża. Din it-trasparenza kienet kruċjali għat-tkabbir tal-ALIVE matul dawn is-snin.”
Hekk kif joqrob it-tluq lejn Bratislava u l-bidu ta’ sfida oħra ta’ sitt ijiem u 1,100 kilometru, l-entużjażmu fost il-parteċipanti huwa wieħed kbir. Għalihom, kull darba li jaqdfu bir-rota se tkun simbolu ta’ tama, solidarjetà u impenn favur il-ħajja.
Borg Bonello sostna wkoll li kull edizzjoni ġġib magħha stejjer ġodda ta’ kuraġġ u solidarjetà. Huwa qal li ħafna mill-parteċipanti jingħaqdu mal-isfida minħabba esperjenzi personali mal-kanċer, kemm jekk bħala pazjenti, qraba jew ħbieb ta’ persuni milquta mill-marda, u għalhekk kull kilometru jakkwista tifsira aktar profonda.”
Wara li diġà ġabret €1.1 miljun għar-riċerka dwar il-kanċer, il-fundazzjoni ALIVE qed tħares lejn il-futur b’ottimiżmu. Għax għal dawn il-voluntiera u ċ-ċiklisti, kull kilometru ma jitkejjilx biss bid-distanza, iżda bil-possibbiltà li xi darba r-riċerka li qed jiffinanzjaw twassal biex jiġu salvati aktar ħajjiet.