Fit-tieni jum tal-Logħob tal-Commonwealth ta’ Glasgow, it-Tim Malta kkompeta fil-Ġinnastika Artistika u fil-Lawn Bowls.
Fil-Ġinnastika Artistika, it-Tim Malta, magħmul minn Philippa Busuttil, Lyana Curmi Inguanez u Sophie St John, ħa sehem fil-kompetizzjonijiet ta’ kwalifikazzjoni tal-All-Around u tal-apparati individwali.
It-tliet ġinnasti Maltin taw prestazzjoni kollettiva pożittiva fis-Subdivision 1 tal-finali tat-timijiet tal-ġinnastika artistika tan-nisa u l-kwalifikazzjonijiet individwali fil-Logħob tal-Commonwealth tal-2026 fi Glasgow, fejn Malta kisbet total ta’ 130.750 punt.
Philippa Busuttil kellha l-aktar ġurnata konsistenti fost it-tliet ġinnasti, hekk kif ikklassifikat fit-tieni post b’45.900 punt. Hija tat l-aqwa wirja tagħha fuq il-balance beam, fejn ir-rutina kunfidenti u mexxejja tagħha kisbet l-ogħla punteġġ fuq dan l-apparat fost il-ġinnasti kollha fil-grupp, u b’hekk ikkwalifikat għar-rawnd finali.
Sophie St John uriet kwalità kbira tul il-kompetizzjoni kollha. Il-qabża tagħha kienet fost l-aktar impressjonanti tas-sessjoni, filwaqt li r-rutina tagħha fuq il-balance beam inkludiet sekwenza mill-isbaħ li qanqlet reazzjoni tajba. Hi spiċċat il-kompetizzjoni b’44.550 punt, iżda l-klassi tagħha kienet evidenti.
Lyana Curmi Inguanez kisbet 40.300 punti u kellha ġurnata mimlija tragwardi personali. Għall-ewwel darba rnexxielha twettaq element fil-qabża fuq xena internazzjonali, u s-soddisfazzjon tagħha wara l-eżekuzzjoni kien evidenti għal kulħadd. L-ispirtu tagħha tul il-kompetizzjoni kien wieħed mill-aktar aspetti pożittivi tas-sessjoni.
Malta temmet fit-tmien post, quddiem l-Indja, in-Namibja, il-Malasja u New Zealand.
Lawn Bowls
Il-koppja Maltija tal-aħwa, Connie u Rebecca Rixon, tilfet 2-0 kontra l-Ingliżi Amy Pharaoh u Sian Honnor fit-tielet rawnd. Il-koppja Ingliża rebħet l-ewwel set 3-2, qabel ma fetħet vantaġġ ikbar u rebħet it-tieni set 8-2.
L-ewwel set kien wieħed tassew bilanċjat, fejn Malta kienet 2-0 minn fuq f’nofs il-logħba, qabel ma l-Ingliżi sabu r-ritmu tagħhom lejn it-tmiem u rebħu s-set fl-aħħar end. It-tieni set kien aktar fuq naħa waħda, bl-Ingilterra tibni vantaġġ bikri u ma ħallitx lil Malta terġa’ tidħol fil-konfront.
Malta kienet f’pożizzjoni li tirbaħ l-end f’diversi okkażjonijiet, iżda l-iskip Ingliża rnexxielha ddawwar l-end favur it-tim tagħha. Il-mument deċiżiv wasal fit-tielet end tat-tieni set. Malta kienet qed iżżomm żewġ shots meta Honnor tat vantaġġ ta’ erba’ shots lill-Ingilterra. B’żewġ ends biss fadal, Malta kellha wisq distakk x’tirkupra.
Wara nofsinhar, Shaun Parnis ta prestazzjoni mill-aqwa biex għeleb lill-Kanadiż Ryan Bester, wieħed mill-aktar plejers ta’kalibru għolja fl-istorja ta’ dan l-isport. Hu rebaħ b’żewġ sets konsekuttivi, 8-5 u 7-4.
Nhar il-Ħadd, il-lawn bowls se jkun l-ewwel sport li jirritorna għall-kompetizzjoni. Filgħodu, l-aħwa Rixon se jikkompetu fir-raba’ rawnd tas-Sezzjoni B tal-Women’s Pairs kontra Tonga, segwita minn logħba kontra l-Afrika t’Isfel wara nofsinhar. Fl-istess sessjoni ta’ wara nofsinhar, Shaun Parnis se jaffronta lill-Indjan Putul Sonowal.
Filgħaxija, il-ġinnasta Philippa Busuttil se tikkompeti fil-finali tal-All-Around tan-nisa fis-18:00, ħin lokali.
