Malta kellha prestazzjoni impressjonanti fit-12-il edizzjoni tal-Kampjonati tal-Karate għall-Istati ż-Żgħar tal-Ewropa, fejn kisbet 63 midalja – inklużi 12-il midalja tad-deheb, 13 tal-fidda u 38 tal-bronż – u spiċċat fit-tieni post fil-klassifika ġenerali tal-midalji.
Dawn il-kampjonati, organizzati mill-Federazzjoni Maltija tal-Karate (MKF) fil-Kumpless Sportiv tal-Kottonera bejn id-9 u l-11 ta’ Ottubru, ġabru flimkien 217-il atleta minn tmien nazzjonijiet Ewropej: Andorra, Ċipru, l-Islanda, il-Liechtenstein, Malta, Monaco, il-Montenegro u San Marino.
Il-parteċipazzjoni ta’ Malta kopriet il-kategoriji kollha tal-età, b’70 atleta jirrappreżentaw lill-pajjiż kemm fid-dixxiplina tal-kata (forom) kif ukoll f’dik tal-kumite (ġlied), minn dawk taħt l-14-il sena (U14) sal-livell tal-kbar (senior).
Malta kisbet suċċess partikolari fil-kata, fejn rebħet tmien midalji tad-deheb. Fost dawk li rebħu d-deheb individwalment kien hemm Francesca Saliba, Dawn Dimech, Jake Vella, Jenna Awad Attia u Jessica Vella. Intrebħu tliet midalji tad-deheb oħra fil-kategoriji tat-timijiet tal-kata (nisa senior, nisa U18 u rġiel U18), fatt li jenfasizza s-saħħa u l-livell għoli tal-atleti Maltin f’diversi gruppi ta’ età.
Fil-kumite, Zenden Seychell, Thyis Antonelli u Heorhii Denysov rebħu midalji tad-deheb individwali, filwaqt li Malta kisbet id-deheb ukoll fil-kategorija tat-timijiet tal-kumite għall-irġiel U16. Diversi atleti oħra kellhom prestazzjonijiet b’saħħithom, u kkontribwew għall-għadd impressjonanti ta’ midalji ta’ Malta kemm fl-avvenimenti individwali kif ukoll f’dawk tat-timijiet.
Malta spikkat ukoll billi rebħet 38 midalja tal-bronż, l-ogħla numru miksub minn kwalunkwe nazzjon parteċipanti. Tmien atleti Maltin kisbu tliet midalji kull wieħed, ħaġa li tirrifletti l-konsistenza u l-istandard kompetittiv murija matul il-kampjonati kollha.
Minbarra l-kisbiet tal-atleti, il-kampjonati mmarkaw ukoll tragward importanti għall-
uffiċjali tal-MKF; Tarek Al Halabi, Eleonora Conti, Jade Conti u Kayla Formosa għaddew b’suċċess mill-eżamijiet tar-refereeing kemm fil-kata kif ukoll fil-kumite, u b’hekk ikkwalifikaw bħala Imħallfin tal-Federazzjoni tal-Karate għall-Istati ż-Żgħar tal-Ewropa.
Din il-kisba tirrappreżenta pass ieħor pożittiv fit-tisħiħ tal-kompetenza teknika tal-MKF u fl-iżvilupp ta’ uffiċjali kwalifikati fi ħdan l-isport.
Il-kampjonati ġew inawgurati uffiċjalment mill-Onor. Byron Camilleri, Ministru għall-Edukazzjoni u l-Isport, waqt iċ-Ċerimonja tal-Ftuħ li saret fl-10 ta’ Ottubru. Iċ-ċerimonja inkludiet ukoll diskors mill-President tal-Federazzjoni Maltija tal-Karate, is-Sur Kenneth Abela, esibizzjonijiet tal-ġinnastika minn parteċipanti tal-“Let’s Move Malta Gymnastics Hub”, u l-kant tal-Innu Nazzjonali Malti mir-rebbieħa tal-Junior Eurovision, Chanel Monseigneur.
Ċipru spiċċaw fl-ewwel post tal-klassifika finali tal-midalji b’total ta’ 66 midalja, inklużi 23 tad-deheb; warajh ġiet Malta bi 63 midalja, u l-Islanda fit-tielet post.
“Il-kampjonati mmarkaw kisba sinifikanti oħra għall-Federazzjoni Maltija tal-Karate, fejn urejna d-dedikazzjoni, it-talent u d-determinazzjoni tal-atleti u l-kowċis tagħna, filwaqt li rrikonoxxejna l-kontribut imprezzabbli tal-voluntiera u l-helpers tagħna. L-isforzi kollettivi tagħhom kienu kruċjali għas-suċċess tal-kampjonati u komplew juru l-kapaċità tagħna li nospitaw avvenimenti sportivi internazzjonali,” ikkummenta s-Sur Kenneth Abela, President tal-Federazzjoni Maltija tal-Karate.
Is-Sur Abela esprima l-apprezzament sinċier tiegħu lejn SportMalta għall-appoġġ imprezzabbli tagħha matul l-organizzazzjoni u t-twettiq tal-kampjonati, filwaqt li rrikonoxxa d-dedikazzjoni, il-professjonaliżmu u l-impenn tat-tim tagħha biex jikkontribwixxi għas-suċċess tal-avveniment. Huwa rringrazzja wkoll lill-Kumitat Olimpiku Malti, lil VisitMalta u lill-Ministeru għall-Ugwaljanza u d-Drittijiet Ċivili għall-appoġġ u l-kontribut siewi tagħhom għal dan l-avveniment sportiv internazzjonali.
L-edizzjoni li jmiss tal-Kampjonati tal-Karate tal-Istati ż-Żgħar tal-Ewropa se ssir fil-Montenegro fl-2027.
