Xufier ta’ tow truck li allegatament laqat sewwieq b’ħadida waqt argument inżamm arrestat wara li wieġeb mhux ħati tal-akkużi miġjuba kontra tiegħu.
Il-każ seħħ kmieni s-Sibt filgħodu meta Leonvic Fenech ta’ 23 sena minn Santa Venera ġie avviċinat mill-allegat vittma li saqsieh dwar vettura li kienet qiegħda timblokka t-triq.
Fenech kien qal lil dan ir-raġel li l-vettura ma kinitx tiegħu. Ġara iżda li l-kwistjoni ma waqfitx hemm u nqala’ battibekk verbali bejn iż-żewġt irġiel.
L-imputat allegatament qabad ħadida mit-tow truck tiegħu u laqat lill-allegat vittma biha, bil-konsegwenza li kkaġunalu ġrieħi gravi f’siequ. Sussegwentement, Fenech kien arrestat.
Huwa tressaq iktar kmieni llum quddiem il-Maġistrat Nadine Lia mixli li weġġa’ gravi lill-allegat vittma, li insultah u heddu, li kiser il-paċi pubblika kif ukoll b’sewqan traskurat u perikoluż.
It-talba għall-ħelsien mill-arrest sabet oġġezzjoni mill-Prosekuzzjoni, l-aktar minħabba l-fatt li għad irid jixhed l-allegat vittma. Barra minn hekk, il-vittma kien jaħdem fl-istess triq fejn joqgħod Fenech u fejn seħħ l-inċident.
Id-Difiża argumentat li l-imputat seta’ jipprovdi indirizz alternattiv f’lokalità oħra filwaqt li fil-fedina penali tiegħu kulma kienu biss żewġ reati marbuta mat-traffiku u ma kien l-ebda “kriminal” li ma setax jiġi fdat fit-toroq.
Barra minn hekk, id-Difiża qalet li kien l-allegat vittma – kick boxer – li kien avviċina lil Fenech.
Madankollu, il-Prosekuzzjoni rrimarkat li argument minuri bħal dan qatt ma messu eskala sa tali punt. “L-akkużat kien qabad ħadida u wara l-argument, tela’ fit-trakk tiegħu u rriversja fuq l-allegat vittma,” tenniet il-Prosekuzzjoni.
Il-Maġistrat Lia ċaħdet it-talba għall-ħelsien mill-arrest billi osservat li l-allegat vittma għad irid jagħti x-xhieda tiegħu mingħajr ir-riskju ta’ intralċ ta’ provi, speċjalmentt peress li l-akkużi kienu dwar ġrieħi gravi.
Il-Prosekuzzjoni tmexxiet mill-Ispettur Sarah Kathleen Zerafa megħjuna mill-Avukat Rebekah Spiteri mill-Uffiċċju tal-Avukat Ġenerali.
L-Avukati Ishmael Psaila u Roberto Spiteri dehru għar-raġel.
