Minn Cristian Muscat
Il-futbol Malti għandu diversi plejers li matul il-karriera tagħhom irnexxielhom jgħixu mumenti speċjali, iżda ftit huma dawk li jistgħu jgħidu li kienu parti minn storja daqshekk kbira bħal dik li kiteb Myles Beerman ma’ Floriana FC matul dan l-istaġun.
Il-plejer xellugi Malti kien wieħed mill-protagonisti ewlenin fit-trijonf tal-Greens hekk kif Floriana rebħu s-27 kampjonat fl-istorja tagħhom biex saru l-aktar klabb ta’ suċċess fil-futbol Malti.
Ir-rebħa drammatika ta’ 2-1 kontra Marsaxlokk fil-Finalissima tal-Malta Premier kienet waħda mimlija emozzjonijiet, tensjoni u kontroversja, iżda għall-plejers ta’ Floriana kienet ukoll il-konferma ta’ staġun mibni fuq sagrifiċċju, xogħol iebes u determinazzjoni.
Myles Beerman ma setax jaħbi l-emozzjoni tiegħu wara s-suffara finali.
Il-plejer ta’ 27 sena, li twieled l-Imġarr u għandu esperjenza kemm f’Malta kif ukoll barra minn xtutna, tkellem ma’ dan is-sit dwar dak li jfisser għalih dan is-suċċess.
“Ma nistax nirringrazzja biżżejjed lill-klabb, lill-kowċis u lill-plejers kollha. Għamilna biċċa xogħol tassew tajba flimkien,” qal Beerman b’ton emozzjonat għall-aħħar.
Floriana kellhom staġun mimli pressjoni. Il-klabb kien jaf li kull partita kienet importanti u li l-aspettattivi kienu għoljin ħafna. Madankollu, taħt it-tmexxija tal-kowċ Daniel Portela, it-tim baqa’ jemmen sal-aħħar.
“Stinkajna ħafna fit-taħriġ. Kull sessjoni kienet intensa u kulħadd kien iffukat fuq l-istess għan. Nemmen li fit-tieni round iddominajna ħafna logħob u urejna kemm konna tim magħqud,” sostna l-internazzjonali Malti.
Il-karriera ta’ Beerman kienet waħda interessanti ferm. Minn età żgħira beda juri talent kbir tant li kellu l-opportunità li jmur jilgħab fl-akkademja ta’ Manchester City fl-Ingilterra. Aktar tard ingħaqad ma’ Glasgow Rangers fl-Iskozja fejn kompla jiżviluppa bħala plejer.
Matul iż-żmien tiegħu ma’ Rangers, huwa kellu esperjenzi ta’ self ma’ Queen of the South, Birkirkara u Gżira United, qabel irritorna Malta b’mod permanenti sabiex jilgħab ma’ Hibernians. Aktar tard ingħaqad ma’ Sliema Wanderers u f’Jannar ta’ din is-sena għamel il-pass lejn Floriana.
Dik il-mossa kienet waħda importanti ħafna fil-karriera tiegħu. Minkejja li wasal f’nofs l-istaġun, Beerman integra ruħu mill-ewwel fil-grupp u sar element kruċjali fit-tim ta’ Portela.
Il-kwalitajiet tiegħu bħala plejer xellugi modern kienu evidenti matul il-kampjonat kollu. B’ritmu tajjeb, enerġija kbira u abilità offensiva, huwa ta bilanċ importanti lit-tim ta’ Floriana speċjalment fil-fażi offensiva.
Minkejja li hu magħruf l-aktar għax-xogħol difensiv tiegħu, Beerman offra ħafna aktar lil Floriana matul l-istaġun. L-esperjenza li kiseb barra minn Malta għenitu jġib maturità u kalma kbira fil-logħob tiegħu, speċjalment f’mumenti ta’ pressjoni. Kien plejer li kapaċi jmexxi lill-kollegi tiegħu fil-grawnd permezz tal-komunikazzjoni u l-intensità tiegħu.
Barra minn hekk, il-versatilità tiegħu ppermettiet lill-kowċ Daniel Portela jbiddel sistemi differenti waqt il-logħob mingħajr ma jitlef il-bilanċ tattiku tat-tim. Din kienet waħda mir-raġunijiet għaliex Floriana rnexxielhom iżommu livell għoli ta’ prestazzjonijiet matul it-tieni parti tal-istaġun.
Madankollu, il-finali kontra Marsaxlokk ma kinitx waħda faċli. Floriana sabu ruħhom minn taħt wara li Rasmus Linden poġġa lil Marsaxlokk fil-vantaġġ b’lob sabiħ fuq il-goalkeeper Guilherme Cioletti.
Dak il-gowl ixxokkja lill-partitarji Furjaniżi, iżda t-tim ma ċediex. Fit-tieni taqsima, Portela bidel l-metodu tattiku u Floriana bdew jagħmlu pressing aggressiv.
L-isforzi tagħhom taw il-frott fit-62 minuta meta Federico Varela skorja l-gowl tad-draw wara pass ta’ Mustapha Jah.
Meta kollox deher riesaq lejn il-ħin barrani, wasal il-mument li se jibqa’ mnaqqax fl-istorja tal-klabb. Fil-ħin miżjud, Kenan Dervisagic skorja f’azzjoni li qanqlet protesti kbar mill-plejers ta’ Marsaxlokk.
Ir-referee Matthew Degabriele kkonferma l-gowl u ftit sekondi wara faqqa’ l-ferħ enormi fost il-partitarji Furjaniżi.
Għal Beerman, dak kien mument li diffiċli jintesa.
“Kien ħaqqna. Ħdimna għalih tul l-istaġun kollu u ma qtajniex qalbna lanqas meta sibna ruħna minn taħt. Dan it-tim dejjem emmen fih innifsu,” qal il-plejer Malti.
Meta mistoqsi lil min jixtieq jiddedika dan is-suċċess, Beerman wieġeb b’mod emozzjonanti.
“Dan it-titlu niddedikah lin-nannu tiegħi,” qal b’vuċi emozzjonata u mbikkma għall-aħħar.
Din id-dedikazzjoni turi wkoll il-karattru umli ta’ Beerman, plejer li minkejja l-esperjenzi internazzjonali tiegħu baqa’ dejjem b’saqajh mal-art u qrib il-familja tiegħu.
Illum, Beerman huwa wieħed mill-aktar difensuri stabbiliti fil-futbol Malti. Bl-14-il dehra mat-tim nazzjonali Malti, huwa kompla jikkonsolida postu bħala wieħed mill-plejers importanti għat-tim nazzjonali.
Barra minn hekk, il-fatt li għandu ċ-ċittadinanza Ingliża permezz tan-nannu tiegħu jagħmel l-istorja tiegħu aktar interessanti, speċjalment meta wieħed iqis il-vjaġġ li għamel minn Malta għall-akkademji ta’ Manchester City u Rangers.
Madankollu, jidher ċar li bħalissa qalbu tinsab kompletament ma’ Floriana. Il-klabb tah opportunità ġdida u flimkien kitbu storja memorabbli.
Is-27 kampjonat mhux biss kien trofew ieħor għall-vetrina ta’ Floriana, iżda simbolu tal-mentalità rebbieħa li rnexxielhom jibnu matul dan l-istaġun.
Għal Myles Beerman, dan jista’ jkun wieħed mill-isbaħ kapitli tal-karriera tiegħu s’issa.
Plejer li għadda minn sfidi, bidliet u esperjenzi differenti, iżda li llum jista’ jgħid bi kburija li kien parti minn wieħed mill-akbar mumenti fl-istorja moderna ta’ Floriana FC.