Minn Cristian Muscat
San Ġiljan ASC ħabbar il-ħatra ta’ Igor Vukanović, li qed jirritorna mal-Klabb bħala Kowċ tat-Tim tal-Kbar.
Vukanović preċedentement serva bħala kowċ tat-timijiet tal-junior matul l-istaġun tal-2016, fejn ikkontribwixxa għall-iżvilupp tal-iskwadri żgħażagħ tagħna u għas-suċċessi li raw lil San Ġiljan jirbaħ il-kampjonati kemm tal-U17 kif ukoll tal-U20.
Bl-esperjenza vasta tiegħu fil-kowċing u l-għarfien tekniku, Vukanović se jkollu rwol importanti fit-tħejjija tat-tim tal-anzjani għall-kompetizzjoni li jmiss, l-European Aquatics Challenger Cup, hekk kif il-Klabb ikompli jsegwi l-ambizzjonijiet tiegħu fix-xena Ewropea.
Il-Klabb ta merħba mill-ġdid lil Igor u awguralu kull suċċess fir-rwol il-ġdid tiegħu.
Intant, dan is-sit għamel kuntatt ma’ Igor Vukanovic innifsu fejn tana iktar dettalji.
Fi kliemu:
“Huwa unur kbir u pjaċir veru li nirritorna ma’ San Ġiljan ASC wara 10 snin. San Ġiljan kien l-ewwel klabb li ngħaqadt miegħu meta ġejt Malta, u kellna perjodu ta’ suċċess kbir flimkien, fejn irbaħna l-kampjonati ta’ taħt is-17-il sena u ta’ taħt l-20 sena.”
“Li nirritorna issa bħala l-kowċ tat-tim tal-kbar hija sfida kbira, iżda waħda li qed nistenna b’ħerqa kbira. Naf lill-plejers tajjeb ħafna u segwejt il-progress tagħhom matul is-snin waqt li kont qed naħdem ma’ klabbs oħra.”
“Ninsab kuntent ħafna li rritornajt fil-post fejn beda l-vjaġġ tiegħi fil-waterpolo Malti, u ninsab entużjast dwar dak li nistgħu niksbu flimkien.”
Bħala klabb, dejjem nimmiraw għall-ogħla għanijiet possibbli f’kull kompetizzjoni li nieħdu sehem fiha. Madankollu, il-prijorità immedjata tagħna hija li nippreparaw sew għall-ewwel sfida kbira tagħna: it-turnew ta’ kwalifikazzjoni għaċ-Challenger Cup, li se jsir f’Malta bejn l-20 u t-22 ta’ Novembru fil-pixxina tal-Kumpless Sportiv tal-Kottonera.
“Nixtieq nieħu din l-opportunità wkoll biex nistieden lill-partitarji u lill-ħbieb kollha tal-waterpolo minn madwar Malta biex jiġu jaraw il-logħbiet u jappoġġjawna waqt li nirrappreżentaw lil Malta f’din il-kompetizzjoni.”
“Bdejna nitħarrġu kmieni ħafna din is-sena, u diġà ninsabu fi stadju avvanzat tal-preparazzjoni tagħna. It-tim qed jagħmel progress tajjeb, u qed naħdmu iebes biex nibnu l-kundizzjoni fiżika, l-għarfien tattiku u l-kimika bejn il-plejers li se jkollna bżonn għall-kompetizzjonijiet li ġejjin.”
“Wara ċ-Challenger Cup, l-attenzjoni tagħna ddur lejn l-Enemed Cup u l-Kampjonat tax-Xitwa. Nemmen f’dan it-tim għax għandna ħafna kwalità u esperjenza fl-iskwadra. Jekk naħdmu flimkien bħala tim wieħed, u nibqgħu ffukati u impenjati bis-sħiħ kemm fit-taħriġ kif ukoll fil-logħbiet, nemmen li għandna dak kollu meħtieġ biex niksbu suċċess. Se jkun hemm bżonn ħafna ħidma u konsistenza, iżda għandi fiduċja sħiħa f’dak li nistgħu nwettqu flimkien.”
