Il-klabb ta’ Rabat Ajax se jfakkar wieħed mill-aktar kapitli importanti fl-istorja tiegħu b’avveniment speċjali li se jgħaqqad flimkien lill-protagonisti ta’ suċċess memorabbli, 40 sena wara li t-tim rebaħ il-Kampjonat Premier Malti.
Taħt l-isem “40: L-Istorja Tagħna”, Rabat Ajax qed jorganizza avveniment uniku li se jlaqqa’ mill-ġdid lill-plejers u l-membri tal-kumitat li kienu parti minn dik l-iskwadra u minn dak is-suċċess storiku.
L-attività se tkun opportunità biex jitfakkru l-mumenti glorjużi li għamlu l-istorja tal-klabb, filwaqt li jingħata ġieħ ukoll lil dawk li sfortunatament m’għadhomx magħna, iżda li kellhom sehem f’dak is-suċċess.
L-organizzaturi beħsiebhom jgħaqqdu l-komunità Rabtija kollha madwar din l-okkażjoni speċjali. Minbarra l-protagonisti ta’ dak iż-żmien, l-avveniment se jlaqqa’ wkoll lill-partitarji li għexu dawk il-mumenti, flimkien mal-iskwadra attwali, l-istaff tekniku u s-segwaċi tal-lum.
Permezz ta’ din l-inizjattiva, Rabat Ajax mhux biss se jkun qed ifakkar ir-rebħ tal-Kampjonat Premier, iżda wkoll jagħti ġieħ lill-persuni li taw kontribut biex il-klabb kiteb paġna importanti fl-istorja tal-futbol Malti.
Għalkemm din l-okkażjoni għandha sinifikat partikolari għall-partitarji ta’ Rabat Ajax, l-avveniment huwa maħsub ukoll biex ikun ta’ interess għal dawk kollha li jħobbu l-futbol Malti u li japprezzaw l-istorja u t-tradizzjoni tal-klabbs lokali.
“40: L-Istorja Tagħna” se tkun għalhekk opportunità biex il-passat jerġa’ jingħaqad mal-preżent, f’tifkira ta’ suċċess li jibqa’ parti mill-identità ta’ Rabat Ajax u mill-memorja tal-futbol Malti.
