Player mill-Malta Premier ġie arrestat u miżmum arrestat talli allegatament offra tixħima lil player ta’ Gżira United qabel il-finali tal-FA Trophy tas-Sibt li għadda kontra Valletta.
Valletta u Gżira United iffaċċjaw lil xulxin fil-finali fl-Istadium Nazzjonali, bil-Beltin joħorġ rebbieħa bl-iskor ta’ 2-1.
Jum qabel il-finali, player ta’ Gżira United informa lill-klabb tiegħu li kien ġie avviċinat minn player ieħor, li mhux fuq il-kotba ta’ Valletta FC, u offrielu somma flus biex jirranġa l-finali tas-Sibt.
Is-suspettat mhux qed jiġi identifikat peress li għadu ma ġiex akkużat fil-Qorti.
Malli rċevew informazzjoni mingħand il-player tagħhom, Gżira United, flimkien ma’ Valletta FC, ikkuntattjaw lill-Uffiċjal tal-Integrità tal-Malta FA u infurmawh bl-allegazzjonijiet.
L-Uffiċjal tal-Integrità tal-MFA fetaħ investigazzjoni dwar il-każ u kkuntattja lill-pulizija, li ħadu t-tmexxija tal-investigazzjoni.
Huwa mifhum li matul l-aħħar jumejn, il-pulizija għaddew mill-evidenza kollha u tkellmu kemm mal-player ta’ Gżira United kif ukoll ma’ uffiċjali mill-klabb tal-Malta Premier.
Nhar l-Erbgħa, il-pulizija arrestat lill-plejer li allegatament offra t-tixħima mhux speċifikata.
Is-suspettat ġie interrogat mill-pulizija u miżmum arrestat sakemm issir aktar investigazzjoni, li se tiddetermina jekk ikunx hemm biżżejjed evidenza biex jiġi akkużat fil-Qorti b’reati ta’ match-fixing.