Portugiża ta’ 22 sena nżammet taħt arrest preventiv wara li tressqet il-Qorti mixlija li daħlet f’pajjiżna madwar erba’ kilogrammi sustanza suspettata droga eroina.
Lara Alexandra De Melo Vital Tomas twaqqfet ilbieraħ mill-Pulizija hekk kif waslet Malta b’titjira minn Pariġi, Franza, wara informazzjoni li x’aktarx kienet qiegħda ġġorr sustanza llegali.
Assistiti minn uffiċjali tad-Dwana, il-Pulizija fetħu l-bagalja u f’qiegħ falz instab pakkett kbir li fih kien hemm l-allegat droga, b’valur fit-triq ta’ madwar €520,000.
Lara tressqet quddiem il-Maġistrat Nadine Lia mixlija b’pussess u traffikar tad-droga. Hija wieġbet mhux ħatja tal-akkużi miġjuba kontra tagħha iżda nżammet arrestata filwaqt li kellha l-assi tagħha ffriżati.
Il-Prosekuzzjoni f’dan il-każ tmexxiet mill-Ispetturi Jonathan Pace u John Leigh Howard.
