B’wirja brillanti, Manchester City rebħu d- derby ta Manchester meta għelbu lill-United bl-iskor ta’ 3-1.
B’din r-rebħa, is-Citizens komplew jixħtu l-pressjoni fuq il-leaders Liverpool filwaqt li Manchester United huma prattikament eliminati mill-kwalifikazzjoni għall-UEFA Champions League.
Ir-Red Devils ma setgħux kellhom bidu aħjar minħabba li wara biss tmien minuti huma fetħu l-iskor meta Bruno Fernandes ikkontrolla l-ballun mill-kick tal- goalkeeper Andre Onana biex għadda lejn Marcus Rashford li kien ġej fuq il- ġirja u venven kanunata minn 20 metru bogħod u ma ta l-ebda ċans lill-goalkeeper, Ederson, isalva.
Peró wara dan il-goal, is-City kibru fl-istatura u b’mod gradwali bdew jiddominaw, tant, li fit-tieni taqsima skorjaw tliet goals … minn doppjetta ta’ Phil Foden (56, 80), bl-ewwel wieħed minn 30 metru bogħod … u Erling Haaland (90) wara żball ta’ Sofyan Amrabat.
Burnley v Bournemouth – Barra minn darhom, Bournemouth għelbu lil Burnley bl-iskor ta’ 2-0.
Kien riżultat kiefer ma’ Burnley minħabba li ħolqu l-aktar ċansijiet iżda fil-football min jiskorja l-aktar jirbaħ it-tliet punti.
B’din it-telfa issa Burnley baqgħu jaqsmu l-aħħar post flimkien ma’ Sheffield United li llum jilqgħu lil Arsenal, fi Bramall Lane.
Il-goals waslu wieħed f’kull taqsima minn Justin Kluivert (13) u Antoine Semenyo (88).
