It-tieni nofs tal-21 ġurnata tal-Premier League Ingliż se jintlagħab f’dawn it-tlett ijiem li ġejjin bil-ħames logħbiet kollha għandhom l- importanza tagħhom minkejja li m’hemmx waħda li tlaqqa’ żewġ timijiet li qed jissieltu għat-titlu.
Il-programm jiftaħ illum meta waqt il-ħin tal-ikel, Arsenal jilqgħu lil Crystal Palace f’derby ta’ Londra fejn rebħa għall-Gunners tarahom jersqu żewġ punti taħt il-leaders Liverpool indaqs ma’ Manchester City u Aston Villa li għandhom 43 punt kull wieħed.
S’issa ftit li xejn sar ċaqlieq matul is-suq tax-xitwa u għalhekk m’hemmx stennija ta’ xi debutt mistenni minkejja li ilhom għaddejjin rapporti li l-clubs iridu jsaħħu l-iskwadri tagħhom.
Min-naħa tal-Palace huma jinsabu sitt punti fuq iż-żona l-ħamra li jfisser li għadhom viċin ir-relegazzjoni meta ġejjin minn rebħa u żewġ draws mill-aħħar sitt logħbiet waqt li Arsenal marru ftit aħjar b’żewġ rebħiet u draw.
Aktar tard filgħaxija jidħlu fl-azzjoni Brentford u Nottingham Forest li ġejjin minn riżultati kuntrastużi fir-replays tat-tielet round tal-FA Cup meta l-Bees tilfu kontra Wolves 3-2 fil-ħin barrani u l-Forest għelbu lil Blackpool 3-2 fil-ħin barrani wkoll.
Iżda llum hemm tliet punti fin-nofs li żgur se jiġu missielta għall-aħħar minħabba li jistgħu jkunu ferm importanti fil-ġlieda biex ma jaqgħux.
L-ewwel logħba ta’ għada wara nofsinnhar tara lit-team tal-qiegħ tal-klassifika, Sheffield United, jilqgħu lil West Ham fi Bramall Lane bil-Blades iddisprati għall-punti biex ma jirritornawx fiċ- Championship sena wara li telgħu.
Min-naħa tal-Hammers huma jinsabu fis-sitt post sitt punti wara l-ġirien ta’ Londra, Arsenal u Tottenham. Huma ġejjin minn telfa diżappuntanti wara li nhar l-Erbgħa ġew eliminati mill-FA Cup minn Bristol City.
Fl-aħħar logħba ta’ għada Bournemouth, li jinsabu ħames punti aktar mit-tielet team mill-aħħar, jospitaw lil-leaders Liverpool li ġejjin minn erba’ rebħiet u żewġ draws biċ-Cherries mhux ‘il bogħod minnhom meta ħadu erba’ rebħiet ukoll u draw jiġifieri punt inqas mir-Reds.
Rebħa għat-team ta’ Jurgen Klopp tiswielu mitqlu deheb meta qed jidher li ċ- champions Manchester City ġejjin tajjeb fit-tentattiv li jżommu t-titlu.
Il-programm jagħlaq għada filgħaxija bil-logħba Brighton kontra Wolves b’tal-ewwel jinsabu tliet punti fuq l-avversarji tagħhom meta fl-aħħar sitt logħbiet kisbu disa’ punti b’Wolves imorru aħjar meta rebħu 13-il punt.
Wolves ġejjin mir-rebħa kontra Brentford fl-FA Cup li fiha kienu darbtejn minn taħt, iżda huma jinsabu trasformati mindu ħatru lil Gary O’Neil bħala manager f’Awwissu li għadd.
