Chelsea għelbu lil Tottenham 4-1 fit-Tottenham Stadium li spiċċaw jilagħbu b’disa’ players f’partita frenetika u kaotika tal-Premier League mimlija drama u kontroversja.
Nicolas Jackson (75, 94 u 97) skorja hat-trick tard fit-tieni taqsima wara li Spurs kellhom lil Cristian Romero (33) jitkeċċa b’karta ħamra diretta, u lil Destiny Udogie (55) ikollu l-istess xorti meta ġie muri t-tieni karta safra.
Kien Dejan Kulusevski li poġġa lit-team tal-manager Awstraljan, Ange Postacoglu, fil-vantaġġ wara biss ħames minuti meta f’kontrattakk x-xutt tiegħu ġie devjat għal ġewwa Levi Colwill.
Iżda Cole Palmer kiseb id-draw mill-penalty li kkommetta Romero fil-35 minuta u ntwera l-karta ħamra għall-foul fuq il-kompatrijott Arġentin, Enzo Fernandez.
B’kollox ġew annullati ħames goals potenzjali jew għal offside jew għal ‘handball’, bi pletora ta’ deċiżjonijiet jiġu riveduti mill-VAR.
Din kienet l-ewwel telfa tal-istaġun għal Tottenham li baqgħu fit-tieni post b’26 punt, b’Liverpool u Arsenal għandhom 24 kull wieħed.
