Il-preżentatriċi televiżiva Eġizzjana Sarah Khalifa u 11-il persuna oħra ġew ikkundannati għall-mewt permezz tat-tgħalliq wara li nstabu ħatja fuq akkużi relatati mad-droga.
Skont il-gazzetta tal-istat Al-Ahram, huma allegatament kienu parti minn grupp kriminali li importa ingredjenti użati biex jiġu prodotti d-drogi, bl-intenzjoni li jinbiegħu. Huma kellhom ukoll armi tan-nar u munizzjon illegali.
Khalifa, li għandha 39 sena, hija magħrufa l-aktar għall-programm televiżiv tagħha Mission Impossible, li kien jittratta kwistjonijiet relatati mal-kriminalità. Hija ċaħdet l-akkużi.
Disa’ mill-ko-akkużati ġew ikkundannati għal għomorhom il-ħabs, filwaqt li sebgħa ġew illiberati.
L-avukat ta’ Khalifa qal li hija se tappella kontra s-sentenza tal-mewt.
Il-verdett tħabbar għall-ewwel darba x-xahar li għadda. Madankollu, ġie kkonfermat biss xahar wara, wara li l-qorti kisbet opinjoni reliġjuża mingħand il-Gran Mufti tal-Eġittu — rekwiżit legali f’każijiet fejn tingħata sentenza tal-mewt.
