Il-President Vladimir Putin qal li r-Russja lesta tuża l-armi nukleari jekk ikun hemm theddida għall-istat, is-sovranità jew l-indipendenza Russa. Dan filwaqt li qal li jittama li l-Istati Uniti se żżomm lura minn azzjonijiet li jistgħu jikkawżaw kunflitt nukleari.
Dan iddikjarah f’intervista mat-televiżjoni tal-istat Russu kmieni l-Erbgħa filgħodu. Huwa ddeskriva lill-President tal-Istati Uniti, Joe Biden bħala politiku veteran li jifhem bis-sħiħ il-perikli possibbli ta ‘eskalazzjoni. Putin qal li Biden ma jaħsibx li d-dinja sejra lejn gwerra nukleari.
Fl-istess ħin, huwa qal li l-forzi nukleari tar-Russja huma lesti kollha. B’referenza għall-armi, Vladimir qal; “Moska lesta tuża l-armi nukleari f’każ ta’ theddida għall-eżistenza tal-istat Russu, is-sovranità u l-indipendenza tagħna”.
Il-mexxej Russu ripetutament tkellem dwar il-fatt li jinsab lest li juża l-armi nukleari sa mill-bidu tal-invażjoni tal-Ukrajna fi Frar tal-2022. Mistoqsi fl-intervista jekk qattx ikkunsidra li juża l-armi nukleari tal-kamp tal-battalja fl-Ukrajna, Putin wieġeb li ma kienx hemm bżonn ta’ dan.
Huwa esprima wkoll fiduċja li Moska se tilħaq l-għanijiet tagħha fl-Ukrajna u żamm il-bieb miftuħ għal taħditiet, filwaqt li enfasizza li kwalunkwe ftehim ikun jeħtieġ garanziji sodi mill-Punent.
