Ir-rata ta’ implimentazzjoni tal-proposti elenkati fil-manifest elettorali Malta Flimkien, fejn b’kollox hemm mal-1,000 proposta, illum diġà qabżet is-66%. “Dan ifisser li qbiżna r-rata ta’ żewġ terzi tal-implimentazzjoni tal-manifest elettorali tagħna.”
Ħabbar dan il-Prim Ministru Robert Abela fil-Parlament waqt li kien qed jitkellem fuq l-implimentazzjoni tal-Budget 2025 bit-tema Pajjiż ta’ Kwalità.
Fid-diskors tiegħu, Dr Abela ħabbar ukoll li fil-jiem li ġejjin se tiġi implimentata miżura oħra li se tkompli ssaħħaħ il-Carer’s Grant li biha jiġu megħjuna l-ġenituri b’ulied minn 16-il sena b’diżabilità severa billi jingħataw għotja għaliex baqgħu d-dar biex jieħdu ħsieb it-tifel/tifla.
Din miżura li daħlet erba’ snin ilu, fl-eqqel ta’ pandemija, u issa se tissaħħaħ billi l-ġenituri li jieħdu ħsieb lil uliedhom b’diżabilità severa, jibqgħu d-dar, issa jkunu koperti bil-bolol akkreditati.
