Raġel Libjan ta’ 32 sena wieġeb mhux ħati għal sensiela ta’ serqiet minn erba’ stabbilimenti magħrufa fl-inħawi ta’ Birkirkara.
Ċittadin Libjan Ahmed Lazoumi, residenti Birkirkara, tressaq il-Qorti nhar it-Tlieta akkużat li wettaq erba’ serqiet separati bejn Lulju u Awwissu.
L-ewwel serqa allegatament seħħet fis-16 ta’ Lulju mill-Butterfly Diner, fejn Lazoumi jinsab akkużat li seraq flus kontanti u xorb alkoħoliku. Ftit aktar minn xahar wara, fit-18 ta’ Awwissu, huwa allegatament seraq flus kontanti u oġġetti oħra mill-ħanut il-Forn tal-Għawdxi, filwaqt li allegatament kkawża wkoll ħsara volontarja fl-istabbiliment.
Huwa jinsab akkużat ukoll b’serqa minn Chick King fit-22 ta’ Awwissu, fejn allegatament insterqu flus kontanti u xorb alkoħoliku u ġiet ikkawżata ħsara volontarja. Ir-raba’ u l-aktar serqa riċenti allegatament seħħet fid-29 ta’ Awwissu minn ħanut tal-Convenience Shop f’Birkirkara, fejn Lazoumi jinsab akkużat li seraq flus kontanti.
Fil-Qorti ntqal li fis-serqiet rispettivi ġew irrappurtati misruqa ammonti ta’ €900, €1,311, €1,148 u €200.
Il-Qorti semgħet li l-Pulizija rċeviet erba’ rapporti separati u sussegwentement eżaminat filmati tas-CCTV. Il Prosekuzzjoni qalet li l-filmati u provi oħra kienu ċari biżżejjed biex il-Pulizija tikseb mandat ta’ arrest fil-konfront tal-akkużat.
Minkejja li wieġeb mhux ħati għall-akkużi kollha fil-Qorti, il-Prosekuzzjoni qalet li waqt l-interrogazzjoni tiegħu mal-Pulizija, Lazoumi esprima dispjaċir għal dak li kien għamel u qal lill-uffiċjali li ried jirritorna dak li kien ittieħed.
Id-Difiża talbet il-ħelsien mill-arrest, filwaqt li argumentat li ma kien hemm l-ebda riskju reali tal-intralċ tal-provi, partikolarment minħabba li l-provi rilevanti kienu diġà ġew ippreservati permezz tal-filmati tas-CCTV.
Il-Prosekuzzjoni rribattiet li Lazoumi kien diġà nstab ħati ta’ serq fil-passat. Hija argumentat li ma setax ikollha serħan il-moħħ jekk l-akkużat jinħeles lura fis-soċjetà, filwaqt li rrimarkat li waħda mis-serqiet allegatament seħħet fi stabbiliment fejn Lazoumi kien xi darba impjegat. Il-Qorti ntqal ukoll li Lazoumi ilu madwar 10 snin ibati minn vizzju tad-droga.
Filwaqt li rrikonoxxiet li kien hemm kwistjonijiet relatati mal-akkużat li kellhom jiġu indirizzati, id-difiża sostniet li dawn setgħu jiġu kkontrollati permezz ta’ kundizzjonijiet stretti għall-ħelsien mill-arrest. Hija pproponiet ordni ta’ superviżjoni u ordni ta’ protezzjoni, flimkien ma’ tagging elettroniku u argumentat li b’dan il-mod l-awtoritajiet ikunu jistgħu jsegwu fejn ikun jinsab Lazoumi f’ħin reali.
Il-Prosekuzzjoni argumentat li t-tagging elettroniku ma kienx se jwaqqaf lill-akkużat milli jerġa jidħol f’dawn l-istabbilimenti, u lanqas ma kien se jelimina r-riskju li allegatament jerġa’ jwettaq reati oħra. Hija qajmet ukoll tħassib dwar is-sitwazzjoni residenzjali ta’ Lazoumi, u qalet lill-Qorti li kienet ġiet infurmata li ma kellux indirizz fiss.
B’reazzjoni għat-tħassib dwar ir-residenza tiegħu, oħt Lazoumi telgħet tixhed għad-difiża u kkonfermat li kienet lesta tilqa’ lill-akkużat biex jgħix magħha f’indirizz fiss jekk jingħata l-ħelsien mill-arrest. Id-deċiżjoni dwar it-talba għall-ħelsien mill-arrest se tingħata in camera.
Il-Prosekuzzjoni tmexxiet mill-Ispetturi Joseph Mallia u Christiana Gatt, flimkien mal-avukat tal-Avukat Ġenerali Gabriel Abela. L-avukat Arthur Azzopardi deher għall-akkużat. Il-Maġistrat Monica Vella ppresediet l-każ.
