Riforma li ilha mistennija biex ma tħallix aktar sfruttament ta’ ħaddiema barranin li jiġu jaħdmu fostna jidher li ġiet milqugħa tant li ma kien hemm ebda kritika dwarha mill-imsieħba soċjali. Dan ifisser li din ir-riforma hija punt ta’ tluq fid-direzzjoni t-tajba.
Bir-riforma li se jwettaq il-Gvern, tliet aġenziji tax-xogħol konnessi mal-ħaddiema barrani se jingħaqdu taħt kappa waħda bil-għan li jkunu regolati. B’hekk mhux biss se jkunu mitigat l-isfruttament tagħhom imma wkoll se jkun regolat kemm ħaddiema barranin jistgħu jinġiebu jaħdmu f’Malta.
Dan kollu joħroġ mill-obbligu tal-liċenzja, bid-Dipartiment tar-Relazzjonijiet Industrijali u l-Impjieg (DIER) se jibda jilqa’ l-applikazzjonijiet mill-1 ta’ Jannar tas-sena d-dieħla, filwaqt li l-liġi se tidħol fis-seħħ mill-1 ta’April tal-istess sena. L-operaturi, imbagħad, se jingħataw ċans sal-1 ta’ Ġunju 2024 sabiex jaġġustaw l-operat tagħhom.
Għalhekk se jkun jista’ jopera biss min ikollu liċenzja maħruġa mid-DIER. Nemmnu li b’dawn ir-regolamenti ġodda, l-awtoritajiet ikollhom viżibiltà ta’ dawn l-operaturi kollha fis-settur, jassiguraw li fil-pajjiż jiġu ħaddiema skont il-ħtieġa u li jiġi evitat l-abbuż fuq dawn il-ħaddiema.
Il-General Workers’ Union (GWU) ilha tisħaq fuq il-bżonn li jkunu regolati dawn l-aġenziji abbażi tal-bżonn li pajjiżna għandu ta’ dawn il-ħaddiema biex jissodisfaw id-domanda fis-suq tax-xogħol. Huwa f’dan il-kuntest li l-unjin saħqet li ħadd m’għandu jieħu vantaġġ mis-sistema għad-detriment ta’ dawn il-ħaddiema.
Paripassu ma’ din il-liġi, il-Gvern se jissokta bid-diskussjonijiet mal-msieħba soċjali sabiex jidħol il-prinċipju tal-ħlas ugwali għal xogħol tal-istess valur, xi ħaġa li l-unjin ilha wkoll tisħaq ħafna fuqha. Nemmnu li għalkemm din hija riforma oħra li tingħaqad ma’ oħrajn favur l-interess tal-ħaddiem, jeħtieġ li l-proċess jieħu l-ħin meħtieġ sabiex fl-aħħar mill-aħħar id-diskussjoni twassal għall-qbil li minnu jibbenefikaw dawn l-istess ħaddiema. Tajjeb li mill-kliem ngħaddu għall-fatti u l-frażi time is up li kellha interpretazzjonijiet differenti minn kelliema taż-żewġ naħat fil-Kamra tar-rappreżentanti, tkun tfisser li issa verament jitwaqqaf darba għal dejjem l-abbuż minn dawk li biex iħaxxnu bwiethom fl-aħħar snin ġabu ħaddiema barranin li fl-aħħar mill-aħħar irriżulta li ma kellhomx il-kwalitajiet biex jaħdmu f’dan il-pajjiż. Dawn spiċċaw f’sitwazzjoni ta’ disperament fejn kellhom jintbagħtu lura f’pajjiżhom mingħajr flus u ikel għax il-karta tagħhom li jiġu u jibdew karriera f’pajjiżna ma kienet xejn għajr abbuż riżultat ta’ nuqqas ta’ teħid ta’ deċiżjonijiet fil-passat.
