Sunday, March 3, 2024

“Se nibqgħu ninvestu fis-settur marittimu biex noħolqu impjiegi ta’ kwalità” – il-PM

Aktar investiment fis-settur marittimu: Marina Di Valletta Ltd b’investiment ieħor ta’ €1 miljun

Aqra wkoll

Il-Prim Ministru Robert Abela inawgura sensiela ta’ proġetti infrastrutturali li saru mill-kumpanija Marina Di Valletta Ltd b’investiment ta’ €1 miljun li ssarraf f’uffiċini ġodda, faċilitajiet mill-aqwa għall-klijenti tal-kumpanija, u ristorant ġdid, investiment li jikkumplimenta is-€6.5 miljun investiment li diġà sar fil-Marina tul dawn l-aħħar snin.

Dr Abela rrimarka li Malta tpoġġiet fuq il-mappa tad-dinja bħala l-aktar flag state prominenti fl-Ewropa u s-sitt l-akbar fid-dinja u sostna li dan huwa riżultat tas-servizz eċċellenti li joffri f’dan is-settur pajjiżna.

“L-awtoritajiet regolatorji tagħna dejjem ħolqu ambjent adegwat u professjonali biex jilqgħu għal investimenti bħal dawn. Is-settur marittimu huwa wieħed importanti ferm għal pajjiżna.”

Il-Prim Ministru spjega li pajjiżna fl-aħħar erba’ snin irreġistra ukoll żieda ta’ 65% fir-reġistrazzjonijiet tas-superyachts.

“B’dan is-suċċess huwa riżultat tal-enfasi fuq il-kwalità. Huwa għalhekk il-pjaċir tiegħi li nkun hawn preżenti llum u nara s-suċċess li qed tagħmlu f’dan il-qasam billi tkomplu tinvestu bil-għan li tgħinu lil Malta tibqa’ quddiem nett f’din l-industrija,” stqarr il-Prim Ministru.

Dr Abela tenna l-impenn tal-Gvern li jibqa’ jinvesti fis-settur marittimu biex jinħolqu impjiegi tal-aqwa kwalità.

Il-President tal-Grupp Azimut Benetti Paolo Vitelli qal li llum hija ġurnata sabiħa għax qed niċċelebraw it-tlestija ta’ infrastruttura għall-jottijiet f’Malta u timmarka l-bidu tal-operazzjoni sħiħa tal-Marina.

“Dan l-aħħar investiment ipoġġi lil Marina di Valletta fl-ogħla livell tas-suq fil-Mediterran. Nistqarr ukoll li sibna l-għajnuna kollha li kien hemm bżonn fuq livell amministrattiv b’kooperazzjoni kontinwa u b’effiċjenza li taqdi l-ħtiġijiet kif suppost u fil-ħin,” stqarr is-Sur Vitelli.

“Aħna nibqgħu lesti li nagħmlu aktar negozju f’din il-gżira sabiħa fejn inħossuha d-dar naturali tagħna,” temm jgħid il-President tal-Grupp.

Preżenti għal din l-okkażjoni kien hemm il-Ministru għat-Trasport, l-Infrastruttura u l-Proġetti Kapitali Ian Borg u ċ-Chairman u Kap Eżekuttiv ta’ Transport Malta Joseph Bugeja.

Marina di Valletta hija konsorzju ta’ investituri barranin u lokali u d-dħul tagħha matul l-2021 kien dak ta’ ftit inqas minn biljun ewro.

Ekonomija

Sport