Fis-Serie A, Inter ġew inkurunati champions meta lagħbu l-aħħar partita f’darhom kontra Lazio li ntemmet fi draw ta’ 1-1.
Ir-riżultat ma tantx kien jimporta minħabba li n-Nerazzurri kienu ilhom li aċċertaw mir-rebħ tal-Iscudetto.
Kien Daichi Kamada (32) li fetaħ l-iskor għal Lazio iżda tliet minuti mit-tmiem Denzel Dumfries xeħet lill-partitarji ta’ Inter f’dellirju ta’ ferħ.
Peró, iċ-ċelebrazzjonijiet tal-preżentazzjoni tat-trofew tat-titlu, kienu mtappna minħabba li l-partitarji kienu konxji li s-sidien, Suning, fi żmien 48 siegħa se jerġgħu jkollhom il-club lura minħabba s-self mhux imħallas lil Oaktree.
Sassuolo v Cagliari – Cagliari aċċertaw is-salvazzjoni meta barra minn darhom għelbu lil Sassuolo bl-iskor ta’ 2-0 li min-naħa tagħhom sfaw relegati.
L-iskorers tat-team minn Sardinja kienu Matteo Prati (71) u Gianluca Lapadula (91). Fit-93 minuta, Sassuolo kellhom lil Matheus Henrique mkeċċi għal żewġ karti sofor.
Monza v Frosinone – Monza laqgħu lil Frosinone u sfaw megħluba bl-iskor ta’ 1-0 biex dawn tal-aħħar baqgħu jittamaw li jsalvaw posthom fl-ogħla diviżjoni.
Udinese v Empoli – Udinese u Empoli spiċċaw fi draw ta’ 1-1 liema riżultat ma kkuntenta lil ħadd hekk kif iż-żewġ timijiet għadhom fil-periklu li fl-istaġun li ġej jilagħbu fis-Serie B.
Iż-żewġ goals waslu mill-11-il metru permezz ta’ M’Baye Niang (90) għal Empoli u Lazar Samardzic (104) għal Udinese.
