Kelliem għall-Pulizija kkonferma ma’ dan is-sit li sewwieq ta’ mutur kellu jiddaħħal l-Isptar wara li iktar kmieni llum, għall-ħabta t-8:00 a.m., kien involut f’inċident tat-traffiku fi Triq l-Imdina, Ħ’Attard.
Minn informazzjoni li waslitilna jidher li seħħet ħabta bejn vettura Suzuki Swift misjuqa minn mara ta’ 25 residenti l-Mellieħa u mutur Suzuki misjuq minn raġel ta’ 44 residenti l-Mellieħa wkoll.
Ir-raġel ingħata l-għajnuna minn tim mediku sakemm seta’ jittieħed l-Isptar Mater Dei permezz t’ambulanza li ssejħet fil-post. Aktar tard huwa ġie ċċertifikat li weġġa’ gravi.
Il-Pulizija għaddejja bl-investigazzjonijiet fuq il-każ.