Albaniż kien ikkundannat sitt xhur ħabs wara li ammetta li pprova jsiefer lejn Dublin b’passaport li ma kienx tiegħu.
Jurgen Quku ta’ 23 sena kien arrestat it-Tlieta li għadda fl-Ajruport Internazzjonali ta’ Malta wara li nstab b’dokument maħruġ f’isem ħaddieħor.
Fil-fatt irriżulta li l-passaport kien irrappurtat misruq u kien jappartjeni lil persuna ta’ nazzjonalità Olandiża. Minn aktar stħarriġ li għamlu l-Pulizija rriżulta li l-imputat kien xtara dan id-dokument wara li rah riklamat fuq profil ta’ TikTok. Fil-Qorti ntqal li dan il-profil illum m’għadux jeżisti.
L-Ispettur Christian Abela, li mexxa l-Prosekuzzjoni, spjega lill-Maġistrat Joseph Mifsud kif l-imputat kien telaq mill-Albanija u qasam lejn il-Greċja bil-mixi. Minn hemm imbagħad qabad titjira lejn Malta.
L-imputat wieġeb ħati tal-akkużi miġjuba kontra tiegħu, u kien ikkundannat sitt xhur priġunerija, bil-Qorti tordna li hekk kif jiskonta s-sentenza jintbagħat lura pajjiżu.
L-Avukat Mark Mifsud Cutajar deher għal Quku.
