Spanja bdiet tosserva tlett ijiem ta’ luttu nazzjonali wara li mill-inqas 68 persuna nqatlu u għexieren oħra ndarbu, wħud minnhom bi ġrieħi, f’wieħed mill-agħar diżastri ferrovjarji fl-istorja moderna tal-pajjiż u anki tal-Ewropa. Ħafna minn dawk li tilfu ħajjithom fl-inċident għad iridu jiġu identifikati.
Timijiet ta’ emerġenza ħadmu bla heda matul il-lejl kollu, biex jaqtgħu l-vaguni tal-metall u jfittxu għal aktar vittmi. L-awtoritajiet qed jinvestigaw il-kawża tad-diżastru nhar l-Erbgħa filgħodu li seħħ meta ferrovija ta’ veloċita qawwija li kienet qed tivvjaġġa minn Madrid għal Sevilja ħabtet b’saħħa ma’ ferrovija oħra li kienet wieqfa fuq il-linji.
Il-Prim Ministru Pedro Sánchez qal li Spanja kollha tinsab imnikkta għal dan l-inċident, u żied jgħid li ħajjiet ġew meqruda, familji nfirdu, u n-niket huwa immens.
Skont il-Ministeru tal-Intern Spanjol, mijiet ta’ ħaddiema ntbagħtu fuq il-post tad-diżastru biex jassistu fl-operazzjonijiet ta’ salvataġġ. F’din il-ħidma qed jintużaw ukoll drones u ħelikopters fi tfittxija biex jinstabu l-vittmi u jitneħħa t-tifrik.
Il-ferrovija operata mill-kumpanija ferrovjarja privata Iryo, li kellha 147 passiġġier abbord kienet wieqfa fuq il-linji minħabba ħsara fis-sistema tal-kompjuter, skont ma qal il-Ministru tat-Trasport ta’ Spanja, Óscar Puente.
Hu kompla qal li meta jkun hemm ħsara fis-sistema, iċ-ċentru ta’ kontroll f’Madrid li jopera 24 siegħa kuljum jieħu f’idejh is-sitwazzjoni, iżda dan ħa deċiżjoni “li ma tistax tiġi spjegata” biex jordna lill-ferroviji jerġgħu jimxu, mingħajr ebda restrizzjoni fuq il-veloċità.
Reġistrazzjonijiet awdjo bejn il-kontrolluri tal-ferroviji f’Madrid u s-sewwieqa tal-ferroviji jidhru li juru li ferrovija waħda b’veloċità għolja ngħatat permess biex tiċċaqlaq, minkejja li ferrovija oħra li kienet quddiemha kienet waqfet ħesrem.
Il-kumpanija Iryo spjegat li l-ferrovija tagħha ntlaqtet minn wara minn ferrovija oħra – operata minn Renfe, il-kumpanija ferrovjarja tal-Istat Spanjol – li kienet qed iġġorr 397 passiġġier. Il-qawwa tal-ħabta wasslet biex diversi vaguni qabżu minn fuq il-linji.
Spanja ġarrbet żewġ diżastri ferrovjarji serji din is-sena, wara li f’inċident li involva ferrovija b’veloċità għolja f’Jannar, qrib Córdoba, tilfu ħajjithom 46 persuna. Dan seħħ fuq l-istess linja tal-inċident tal-Erbgħa, iżda ħafna aktar lejn in-Nofsinhar.
Wara dan l-inċident fatali, il-biċċa l-kbira tal-partiti politiċi ssospendew il-kampanji tagħhom għall-elezzjonijiet li se jsiru dalwaqt.
