Il-holders Inter ikkwalifikaw għall-kwartifinali tal-Coppa Italia meta għelbu lit-team mis-Serie B, Parma, bl-iskor ta’ 2-1 liema partita kellha tmur fil-ħin barrani.
Il-goalkeeper ta’ Parma, il-leġġendarju Gigi Buffon ta’ 45 sena li kien qed jagħmel il-50 dehra tiegħu f’San Siro, kien il-protagonista f’din il-partita fejn żamm lit-team tiegħu fil-logħba b’għadd ta’ saves determinanti.
Anzi, Parma kienu resqin lejn sorpriża meta sa żewġ minuti minn tmiem il-ħin normali kienu qed igawdu vantaġġ ta’ 1-0 skorjat minn Stanko Juric (38) b’xutt minn barra l-kaxxa li ħasad għal kollox lil Andre Onana.
Wara li Adrian Benedyczak resaq viċin li jirkoppja, Inter kisbu d-draw fit-88 minuta b’xutt minn tarf il-kaxxa ta’ Lautaro Martinez.
U fil-ħin miżjud, Buffon salva goal ċert fuq tentattiv ta’ Edin Dzeko.
Madakollu fil-ħin barrani Inter skorjaw dak li kellu jkun il-goal tar-rebħa meta fil-110 minuta, minn daqqa ta’ ras ta’ Francesco Acerbi.
Issa n-Nerazzurri jilagħbu kontra r-rebbieħ bejn Atalanta u Spezia.
