Il-General Workers’ Union (GWU), il-Union of Cabin Crew (UCC), l-Airline Pilots Association Malta (ALPA) u l-Association of Airline Engineers Malta (AAE) jesprimu t-tħassib tagħhom dwar il-kummenti li għamel il-Ministru għall-Finanzi Clyde Caruana fis-6 ta’ Ottubru 2026, b’rabta mas-sitwazzjoni fil-KM Malta Airlines.
Referenzi għal “aġendi moħbija” u “manuvri minn taħt”, li jagħtu x’jifhem li jista’ jkun hemm individwi li jixtiequ jaraw il-linja tal-ajru tfalli, jistgħu joħolqu inċertezza fost il-ħaddiema fi żmien meta l-istabbiltà, il-fiduċja u d-djalogu kostruttiv huma partikolarment importanti.
Dawn it-trade unions jemmnu li allegazzjonijiet bħal dawn għandhom jiġu ttrattati b’kawtela. Madankollu, jekk tassew ikun hemm tentattivi intenzjonati biex idgħajfu l-linja tal-ajru jew ipoġġu l-futur tagħha f’riskju, dawn ikunu ta’ tħassib serju u għandhom jiġu kkundannati bil-qawwa kollha.
Fil-qalba ta’ din is-sitwazzjoni hemm il-ħaddiema tal-KM Malta Airlines. Dawn huma persuni li ta’ kuljum jiddedikaw il-ħin u l-enerġija tagħhom biex il-linja tal-ajru tkompli topera, u li l-għajxien tagħhom u tal-familji tagħhom jiddependi mill-futur tagħha.
Wara kull diskussjoni dwar il-futur tal-linja tal-ajru hemm ħaddiema li jfittxu sigurtà, stabbiltà u ċarezza dwar l-impjieg tagħhom u l-benesseri tal-familji tagħhom.
Il-futur tal-KM Malta Airlines huwa kwistjoni ta’ importanza nazzjonali u għandu jiġi indirizzat b’responsabbiltà, trasparenza u rispett reċiproku. Il-ħaddiema m’għandhomx jitħallew iħossu li t-tħassib leġittimu tagħhom jew l-inċertezza li jista’ jkollhom dwar il-futur qed jitqiesu b’suspett.
Dawn it-trade unions jemmnu li t-triq ’il quddiem għandha tkun mibnija fuq komunikazzjoni miftuħa, djalogu kostruttiv u impenn komuni biex jiġi mħares il-futur tal-linja tal-ajru, kif ukoll tal-ħaddiema li jagħmlu l-operat tagħha possibbli.
Fl-aħħar mill-aħħar, il-futur tal-KM Malta Airlines u dak tal-ħaddiema tagħha huma marbuta mill-qrib ma’ xulxin. It-tnejn jistħoqqilhom l-attenzjoni u l-kunsiderazzjoni meħtieġa sabiex id-deċiżjonijiet li jittieħdu llum iwasslu għal aktar stabbiltà u fiduċja fil-ġejjieni.